ماجدة خير الله توجه رسالة لنقابة المهن التمثيلية
حرصت الناقدة السينمائية الكبيرة ماجدة خير الله على توجيه رسالة إلى نقابة المهن التمثيلية لعمل دورة تثقيفية للفنانين قبل منحهم تصريح لممارسة التمثيل أو عضوية للنقابة .
رسالة ماجدة خير الله لنقابة الممثلين
كتبت ماجدة خير الله منشور على صفحتها الرسمية عبر موقع التواصل الاجتماعي "فيسبوك" وعلقت قائلة : "ياريت نقابة الممثلين قبل ما تمنح أي تصريح أو عضوية لأي فنان تخضعه لدورة تثقيفية يشاهد فيها أهم أفلام السينما المصرية في مراحل مختلفة حتى يكون مطلعا على كيفية تطور الأداء عند أهم نجوم الفن المصري وأهم الأفلام والقضايا المطروحة" .
وأضافت : "وفي نهاية الدورة يجرى اختبار شفهي وتحريري مثل تلك الاختبارات التي تجريها معهد السينما لغربلة المتقدمين واختيار أفضلهم، لأن مستوى ثقافة الممثلين الجدد في غاية السوء وحالة تكسف وتعر" .
جدير بالذكر، شنت الناقدة السينمائية الكبيرة ماجدة خير الله هجوما على بعض الفنانين الذين هاجموا الفيلم الهندي حياة الماعز الذين يتهمونه بأنه يسئ للمملكة العربية السعودية، حيث كتبت منشورا على صفحتها الرسمية عبر موقتع التواصل الاجتماعي "فيسبوك" وعلقت قائلة: "فجأة خرج علينا مجموعة من الفنانين بيرددوا نفس الكلام وبنفس الصيغة ومضمونها فيلم حياة الماعز إهانة للسعودية وإنتاجه وراه الإخوان ومش هنسكت على هذه الإهانة" .
وأضافت : "الفيلم هندي وعن رواية مأخوذة من الواقع، أنا كل اللي شاغلني عايزة أعرف مش هيسكتوا يعني هيعملوا إيه، ومين اللي أملى عليهم هذه الصيغة الركيكة اللي كلهم بيرددوها في نفس الوقت، والسؤال الأخير مش مكسوفين من نفسكم" .
وفي وقت سابق، قالت ماجدة خير الله في تصريحات خاصة لـ"مصر تايمز"، "أنا شوفت الفيلم، والفيلم طرحه ومستواه جيد ومؤثر جدًا، وطبيعي الأفلام تعمل ضجة يعني هل المفروض الأفلام تنزل بهدوء ملهاش حس ولا خبر، مضيفة بالتأكيد لو فيلم مهم هيعمل ضجة، والفيلم ضد نظام الكفيل وضد معاملة العمالة الآسيوية بشكل فيه عدم إنسانية، وده عن قصة حقيقية فيها شئ أقرب للعبودية يعني، فطبيعي إنه يعمل ضجة وياريت يفكروا يغيروا هذه الأنظمة لأنها غير إنسانية".
وأضافت، ولو دول الخليج عندهم بعد نظر وبما إنهم بيسعوا لتغيير كثير من أنظمة المجتمع للأفضل وللأكثر عصرية هيعملوا كدة، لأن دول كتير جدا بتستقدم عمالة من الخارج، ومفيش بقى العبودية والكفيل والذل واللي داخل ده كدة مفقود يعني".
وصرحت عن غضب دول الخليج من الفيلم: "طبيعي إن يكون فيه ناس مش عايزة حد ينتقدها وعايزة تفضل تمارس ما تمارسه من أسلوب غير إنساني ومحدش يقولها لا، ناس كتير جدا بتروح تشتغل في أوروبا وأماكن كتير جدا ولكن مبيلاقوش هذا التعامل الغير إنساني، وإذا دول الخليج شايفة إن دي حاجة ضدها، وهو فعلا ضده لأن مسألة فعلا مفيش حد يعامل حد بالشكل ده، وأنت لازلت محتاج للعمالة الخارجية سواء آسيوية أو أفريقية عليك إن أنت تغير بعض النظم وبعض القوانين".
وأوضحت: "أمريكا ذات نفسها وده الفرق بين المجتمعات كانت بتستقدم العمال الأفارقة وتستعبدهم، والسود دول لحد الستينات وبعد الستينات بيتعاملوا معاملة الحيوانات، من كثرة النقد اللي عليهم ابتديت القوانين تتغير وأدركوا إن العالم كله بيبص عليهم، وده غير إنساني، وأصحاب الحق هيبتدوا يعترضوا، فإذا أنت عايز تطور من مجتمعك عليك إن أنت تلجأ للقوانين الإنسانية اللي الناس توافق عليها".
وعلقت على تداول رواد التواصل الاجتماعي بأن الفيلم يعد رد إساءة للسعودية بعد اتهام السعودية للإساءة للمصريين بالأفلام : "أنا مش فاهمة هو الناس متصورة إن الهند عاملة فيلم تردلنا اعتبارنا حاجة غريبة اوي، وأنا مش عارفة إيه الهبل ده كما تدين تدان إيه وهبل إيه، أنت قاعد مبتعملش حاجة ومستني يعمل فيلم علشان أنت تتبسط وتتشفى، إيه الهبل ده، وأنا لا أعير اهتمام بما يقوله السوشيال ميديا، دول ناس فاضيين معندهمش قدرة على قراءة الواقع كما هو أو تحليل الظواهر بشكل جيد، الناس بتهيج مرة واحدة بدون ما تعرف بتهيج، وبعد كدة بيسكتوا فجأة كدة، موجات من الهوجة الغير مفهومة وغير مبررة".
