"الفناء قادم لا محالة".. عباس أبو الحسن يعلق عن كثرة الوفيات
علق الفنان عباس أبو الحسن علي كثرة الوفيات الفترة الماضية والحالية وذلك بعد وفاة النجمان حسن يوسف ومصطفى فهمي.
ونشر عباس أبو الحسن منشورا عبر صفحته الرسمية "فيس بوك" معلقا عن كثرة الوفيات " كنت برجع في الصفحة بتاعتي بدور على پوست معين كتبته من كذا سنة . اتصدمت لما شفت كم الناس اللي ماتت من الأصحاب الأعزة، والشخصيات العامة، والقامات الفنية . منهم كتير ماتوا ومحصلوش نص متوسط الحياة المفترض".
وتابع: "واعتراني إحساسين وفكرتين متناقضين ؛ إزاي إن جميعنا في طابور واحد نقترب من حافة القبور، وأن القدر ممكن، ولأسباب غامضة، يدفع بك في لحظة إلى أول الطابور ، ومش لازم تكون مريض بمرض عضّال أو في حادثة، كتير ماتوا وهمه نايمين، وهمه في الشغل، عندي صديق عزيز مات وهو في الچيم وصديق عزيز آخر مات وهو في الجو على طيارة هو الكابتن بتاعها".
وأضاف" الإحساس الأول انك لازم تحاول تعيش متسق مع ذاتك، ودة يتطلب انك تعرف نفسك معرفة حقيقية، تتمتع بعلاقات حقيقية دافئة مع ناس بتحبهم وبيحبوك، تعيش بشرف وأنك تدرك إن الشخص الوحيد في الكون اللي يفرق معاك هو شايفك ازاي هو إنت، وانك تعيش من اجل غرض ما الأفضل انه يكون غرض نبيل
مافيش حد مشي في رحاب القطيع
واستكمل: "مافيش حد مشي في رحاب القطيع وكان متحقق وراضي وفي سلام مع نفسه، ان الحياة فعلا قصيرة وعبثية، ان الحياة لا تقاس بالنجاح والا مكانش فيه مشاهير وعظماء وأساطير انتحروا دون سابق انذار ، ان الحياة في الحقيقة تُقاس بعدد التجارب الحياتية اللي انت عشتها بشغف وبكلك. الحاجة التانية؛ انك تدرك ان الفناء قادم لا محالة وبدون انذار، وان الكفن مالوش جيوب ، وان فجأة وانا أعني فجاة، هتصحى يوم تكتشف فيه ان الحياة مبقتش قدامك.. الحياة وراك.
واختتم: "اهم حاجة في الإدراك دة، ان لما يحصل دة، متحسش بالذعر، لانك فعلا عشت وانك عملت حاجات كويسة اكتر ما عملت حجات وحشه وانك حبيت واتحبيت، ما سيبتش العالم أبشع من لما جيت فيه، واخيراً انك تسامح نفسك وتطببط على روحك مش تجلدها ، وانك تقول لنفسك : أن أي حاجة عملتها كانت مدفوعة بإدراك وفهمي ومخاوفي وقتها".
