بعد تعرضه للانتقادات.. كوينتين ترانتينو يشيد بفيلم Joker 2

تزامنا مع تعرض فيلم Joker 2 للعديد من الانتقادات وحصده الكثير من ردود الفعل السلبية وعدم تحقيقه الإيرادات المتوقعة، حرص المخرج العالمي كوينتين ترانتينو على الإشادة بفيلم Joker 2 وأبدى بإعجابه بالفيلم . 

إشادة كوينتين ترانتينو بفيلم Joker 2 

قال ترانتينو في تصريحات تليفزيونية : "ذهبت لمشاهدة فيلم Joker 2 متوقعًا أن أُعجب بصناعة الفيلم، واعتقدت أننى أمام عمل سيحتوى على تمرينًا فكريًا بعيدًا عن الموضوع الأصلى". 

وأضاف : "أنا شخص عدمى بما يكفي للاستمتاع بفيلم لا ينجح، لكن Joker 2 يشبه فوضى كبيرة، ولم أجده تمرينًا فكريًا، لقد أحببت المشاهد الموسيقية، وتعمقت فيها، واعتقد أن الأغاني كلما كانت أكثر تفاهة، كانت أفضل".

وتابع : "تود فيليبس هو الجوكر الحقيقى، وليس خواكين فينيكس" . 

فيلم Joker 2 

وفي سياق متصل، يواصل فيلم Joker 2 تحقيق إيرادات صادمة وغير متوقعة منذ طرحه محليا وعالميا، وذلك عندما حقق في الشباك التذاكر الأمريكي 57 مليون و875 ألف دولار، بينما حقق في الشباك التذاكر العالمي 143 مليون و500 ألف دولار، ليبلغ إجمالي إيرادات الفيلم حول العالم 201 مليون و375 ألف دولار . 

جدير بالذكر، تحدث الناقد السينمائي الكبير ومدير مهرجان القاهرة السينمائي الدولي عصام زكريا عن سبب عدم إقبال الجمهور على فيلم Joker 2، وحصول الفيلم على تقييمات سلبية منذ عرضه بالسينمات على مستوى العالم، كما علق أيضا على قرار المخرج تود فيليبس بجعل الجزء الثاني من الفيلم غنائي . 

وقال عصام زكريا في تصريحات خاصة لـ "مصر تايمز" على قرارالمخرج لجعل الفيلم غنائي : "أعتقد هي لحل مشكلة كئابة الموضوع بتاع الفيلم إن هما عايزين يعملوه غنائي لأن السيناريو من غير الأغاني فيه جرعة كئابة". 

وصرح: "المشكلة الأولى في الفيلم ده هما عايزين يقولوا إيه، يعني في الجزء الأول أنت استغليت الشعبية بتاعت الجوكر كشخصية Anti Hero لكن حققت نجاح كبير خاصة بعد ما هيث ليدجر عمل الشخصية وبقى ليها شعبية تنافس باتمان مع إنه Anti Hero أصلا، ف هما حبوا إن دي تبقى أول مرة في DC وMarvel إن الشخصية الشريرة تبقى هي الشخصية الرئيسية، والفيلم نجح نجاح كبير جدا". 

وأضاف: "طب هو دلوقتي النجاح اللي حققته الشخصية دي خطر، لأنه أنت في الآخر ممكن تقدم الشخصيات التخريبية دي ك Anti Hero، ولكن مينفعش إن أنت تعمل عنها سلسلة اللي هو يفضل هو البطل، ف هتكلم إزاي لأن مينفعش نخلي الناس تفضل تتعاطف معاه وهي شخصية شريرة". 

وتابع: "خصوصا إن النجاح بتاع الجزء الأول عمل كدة يعني كان بين المراهقين والشباب الصغيرين اللي حابين الشخصية وعايزين يقلدوا الشخصية اللي عايز يقتل أمه واللي عايز يقتل أبوه واللي عايز الناس، ف خطر قرروا يموتوا الشخصية بما إن الناس شافت الفيلم". 

وأوضح: "قررت تموت الجوكر يعني ممكن تلعب في الحتة دي 10 أفلام لغاية ما تموتها، يعني بس هما قرروا يموتوه أول حاجة علشان يسحبوا التعاطف اللي حصل مع الشخصية في الجزء الأول، وأعتقد إنه تمهيد يعملوا جزء تالت يطلع فيه الجوكر بتاع باتمان تاني، لأنه أنت بتتكلم على إنهم بيتعاملوا مع الشخصية دي على إنها حقيقة وليها زمن، طيب فين الجوكر بتاعت باتمان، يعني أنت جيبتلي بدايات الجوكر وإزاي الجوكر أول مرة يعمل جريمة في حياته، وإزاي أول مرة يلبس لبس الجوكر وبقى مجرم، لسه معملش أي حاجة مع باتمان، إيه بقى الشخصية اللي بدأت من الكوميكس والمسلسلات وبدأت تطلع في الأفلام مين هو، لازم يتعمله فيلم تاني بقى كدة". 

واستكمل: "ف أول فيلم كإنه همزة وصل كدة علشان يعالج الشخصية بطريقة مختلفة مع التعاطف الشديد اللي كان موجود في الجزء الأول، وكل عناصر الجذب الجماهيري اللي كانت موجودة في الجزء الأول معدومة في الجزء التاني، الأكشن مش موجود ومفيش أحداث تقريبا يعني على مدار ساعتين مفيش أحداث، الشخصية نفسها مش جذابة زي الجزء الأول، هو الفيلم معمول كويس وأنا شايف إن الأغاني مش سبب في فشل الفيلم، معتقدش إن المشكلة كانت إن جمهور نوعية فيلم زي الجوكر إنه يدخل الفيلم علشان يسمع أغاني، لإن لو الفيلم كان فيه اللي الناس متوقعاه بالأغاني كان الفيلم كسر الدنيا". 

وفي وقت سابق، كشف الناقد السينمائي الكبير ومدير مهرجان القاهرة السينمائي الدولي عصام زكريا عن رأيه بالجزء الثاني من فيلم "Joker" باعتباره معروضا في فعاليات مهرجان فينيسيا السينمائي الدولي بدورته الـ 81 وكان أيضا عصام زكريا أبرز الحاضرين لفعاليات المهرجان، وذلك بعد أن حظى الفيلم بتقييمات غير متوقعة بالمرة عند عرضه الأول بالمهرجان.

وقال عصام زكريا   في تصريحات خاصة لـ "مصر تايمز": "أولا الشخصية من أيام دارك نايت لما لعبها هيث ليدجر والشخصية محبوبة جدا، وده شجع هوليوود إنها تعمل فيلم من بطولة الشخصية بتاعت الجوكر".

وأضاف: "الفيلم الأول حقق نجاح كبير جدا طبعا، ولكن في الفيلم الجديد هيبقى صادم لعدة مستويات، أولا مفيهوش أكشن، والشخصية بتاعت الجوكر مختلفة عن الجزء الأول خالص أقل حيوية وأقل حياة بكثير عن الجزء الأول".

وصرح: "وإضافة إلى ذلك إنه ينتهي بنهاية صادمة لكل عشاق الشخصية، وفيه ثغرات في القصة والسيناريو والفكرة والنهاية يعني يختلفوا تماما عن توقعات أعتقد إنه سيكون مختلف للغالبية الساحقة من توقعات الجمهور، وده طبعا الصدمة في الفيلم".

وأوضح: "وده هيأثر جدا في نجاح الفيلم معتقدش إنه هيعمل إيرادات زي الجزء الأول".

ويشارك في بطولة الفيلم كل من خواكين فينيكس وليدي جاجا وزازي بيتز، ومن تأليف وإخراج تود فيليبس.

تدور أحداث الفيلم حيث يلتقي الممثل الكوميدي الفاشل آرثر فليك بحب حياته، هارلي كوين، أثناء احتجازه في مستشفى أركام، وبعد خروجه، يخوض الاثنان مغامرة رومانسية محكوم عليها بالفشل، عبر مدينة جوثام المليئة بالفساد، لتقع بذلك العديد من المتاعب.