28 نوفمبر.. منة شلبي تقدم مسرحية شمس وقمر بموسم الرياض
تستعد الفنانة منة شلبي لتقديم مسرحية جديدة بالمملكة العربية السعودية تحمل اسم شمس وقمر ضمن فعاليات موسم الرياض يوم الخميس المقبل الموافق 28 نوفمبر الجاري ومن المقرر أن يستمر حتى يوم 2 ديسمبر المقبل .
طرح مسرحية شمس وقمر بموسم الرياض
حيث أعلن المستشار تركي آل الشيخ رئيس الهيئة العامة للترفيه عن المسرحية من خلال نشره لبوستر المسرحية على صفحته الرسمية عبر موقع تبادل الصور والفيديوهات "إنستجرام" وعلق قائلا : "المسرحية الكوميدية شمس وقمر من بطولة الفنانة منة شلبي والفنان بيومي فؤاد ومجموعة من النجوم على مسرح بكر الشدى، من 28 نوفمبر حتى 2 ديسمبر" .
آخر أعمال منة شلبي
استطاعت الفنانة منة شلبي أن تحقق نجاحا هائلا خلال الفترة الحالية بعد طرحها لفيلم الهوى سلطان الذي يشاركها البطولة الفنان أحمد داوود وأحمد خالد صالح وجيهان الشماشرجي، ومن تأليف وإخراج هبة يسري .
جدير بالذكر، كشفت المؤلفة رشا الجزار عن تطورات أزمتها مع هبة يسري مؤلفة ومخرجة فيلم الهوى سلطان، وذلك بعد أن اتهمت مؤلفة الفيلم بسرقة الفكرة .
وقالت رشا الجزار في تصريحات خاصة لـ"مصر تايمز" : "أنا كنت النهاردة في النقابة وبكرة هقدم مذكرة رسمية لنقيب المهن السينمائية والموضوع هيبقى عند النقابة والنقابة اللي هتفصل بيني وبينها" .
وأضافت : "وأنا محبش أعمل شوشرة لحد ولا هدفي أشوش على نجاح حد ولا أسرق نجاح حد، ولو مكنتش حريصة على ده مكنتش حاولت لمدة يومين إني أكلم المؤلفة علشان أستفسر منها وللأسف هي مردتش عليا، ف الموضوع بكرة هيبقى في النقابة" .
وردا على منشور هبة يسري قالت : "أنا شوفت اللي هي كاتباه وأنا من يوم الخميس لحد امبارح قبل ما أكتب البوست بساعة أنا بحاول أتصل بيها هي مش بترد عليا، وأنا كنت محتاجة أتكلم معاها واسألها هل أوجه التشابه اللي موجودة بكل هذا الكم من التفاصيل من أين، هل ده توارد خواطر ولا هل ده أنتي، هل أنتي قرأتي ورقي ولا حد اقترح عليكي الموضوع من البداية واللي عايز يقول أي حاجة يقولها، أنا سعيت إني أتواصل معاها وإن أنا أعرف أوجه التشابه دي كلها لأن أنا محتكيتش بيها قبل كدة في حياتي خالص وهي مرديتش عليا، ف أنا كتبت البوست لأنه إحساس صعب جدا إنك تتأذي وأنت تسكت، وبالتالي أنا همشي في الإجراءات الرسمية أنا كنت النهاردة في النقابة وبكرة هقدم مذكرة رسمية للنقيب والنقيب هيقعد معانا احنا الاتنين ويسمع مننا" .
وتابعت عن دعم بعض النجوم لهبة يسري قائلة : "هما يعرفوها أو عندهم علاقة بيها أو هما بيحبوها، أنا معنديش مشكلة بس أنا حاسة إن فيه تسرع في امتى تدعم أصحابك على حساب الطرف التاني، أنتوا صناع المفروض النقابة جهة فصل بيننا والنقابة هتقدر توصل إذا كان فيه حد بيدعي على الآخر يعني إذا كان أنا بدعي عليها أو هي بتدعي عليا أو فعلا ده توارد خواطر النقابة اللي هتفصل، ومش من المهنية إن يكون فيه حد من الصناع يقول فيه فلان صح وفيه فلان غلط، أنا شايفة إن ده مش من المهنية، وكنت أتمنى إن الناس تنتظر حتى النقابة تفصل في الموضوع ولكن من حق أي حد يدعم أي حد ومن حق أي حد يقول اللي هو عايزه، وفيه كلام كتير مش مظبوط بس أنا مش هرد، وأنا مش هدفي إني أعمل شوشرة لأن للأسف هما قالوا كلام كتير مش حقيقي ومش عايزة أنساق في إني أدخل في مهاترات" .
وردا على منشور عمرو سمير عاطف حول أن يجب التأكد من وجود سرقة للفكرة صرحت : "أنا في بداية الموضوع بحاول أتصل بالمؤلفة علشان أستفسر منها علشان أقيم ده توارد خواطر ولا لا، كانت الوسيلة بالنسبة لي إني أحاول أوصلها وأتكلم معاها علشان اتأكد هل ده عن عمد ولا توارد خواطر، تجاهلها وعدم ردها هو اللي خلاني أتكلم في الموضوع" .
وصرحت عن سعيها لعرض السيناريو على شركات الإنتاج : "أنا عرضته على شركات إنتاج وعرضته على مخرجين ولكن لم أتواصل مع مؤلفة العمل ولا مع شركة الإنتاج وأنا كاتبة ده في البوست إن كل الاحترام للصناع والنجوم وشركة الإنتاج لأنهم ميعرفوش حاجة، وأنا حددت موقفي مع المؤلفة" .
