"بسبب شوية تراب".. مدير مركز صيانة يروي كواليس اعتداء المخرج محمد سامي عليه (خاص)

حصل "مصر تايمز" على نص التحقيقات في قضية اتهام المخرج محمد سامي بالتعدي على صاحب مركز صيانة سيارات بالشيخ زايد، بسبب حدوث تلفيات لسيارته داخل مركز الصيانة.

نص التحقيقات أقوال المجني عليه

واستدعت جهات التحقيق مدير مركز الصيانة المعتدى عليه من المخرج محمد سامي لسؤاله حول الواقعة.

وجاءت أقوال مدير مركز الصيانة المعتدى عليه من المخرج محمد سامي الآتي:

اسمي: "أحمد، م، أ، ف"، عندي 24 سنة، طالب بكلية هندسة جامعة أم إس إي إيه بالفرقة الخامسة ومدير محل أوتورات الأفلام حماية وعزل السيارات.

س: ما قولك فيما هو منسوب إليك من أنك متهم بسب المجنى عليه محمد سامي بألفاظ تتضمن خدش الشرف والإعراض وذلك على النحو المبين بالتحقيقات؟

 ج: محصلش

س: ما قولك فيما هو منسوب إليك من أنك متهم بالتسبب بإهمالك في إتلاف السيارة المملوكة للمجنى عليه محمد سامي وذلك على النحو المبين بالتحقيقات؟

 ج: محصلش

س: ما قولك فيما هو منسوب إليك من أنك تعديت على المجنى عليه محمد سامي ولم ينتج عن ذلك تعدٍ ضرباً أو جرحاً وذلك على النحو المبين بالتحقيقات؟ 

ج: محصلش

س: اذكر لنا تفصيلات ما حدث؟ 

ج: اللي حصل إني شغال مدير معمل أوتورات لحماية وعزل السيارات في سنتر العايق بيفرلي هيلز وصاحب المركز اسمه "أحمد أ"، ويوم 2024/7/14، تواصل معي صاحب المركز، واحد اسمه محمد سامي على الفيس بوك وبلغني إنه عايز يعمل حماية كاملة لسيارته وساعتها صاحب المركز قاله تمام وإن المركز هيعمله عزل حراري للزجاج ونانو سيراميك للفرش وجرفين للفيبر والجنوط مجانًا واتفق مع معاه أنه يجيب العربية تاني يوم الصبح الساعة 10 واحنا بنفتح المحل الساعة 11 وأنا نزلت بدري اليوم ده عشان استلم العربية.

وأضاف المعتدى عليه من المخرج محمد سامي: فعلاً جالي محمد سامي ومدير أعماله اسمه كريم وسلموني العربية وساعتها أنا عاينت العربية بتاعته وماكانش فيها أي تلفيات وبعد ما استلمت العربية منه بلغني محمد سامي إنه محتاج العربية يوم الأربعاء 2024/7/17، وأنا يومها خليت الصنايعية يشتغلوا فيها ويوم 17 محمد سامي جه واستلم العربية مني الساعة 10 بالليل وكان فيها حاجات لسه مخلصتش لأن المدة غير كافية واللي كان فيها ناقص القوايم اللي بين البيبان بتاعت العربية.

وتابع: اليوم ده كان محمود.أ، أخو صاحب المركز كان موجود ومحمد سامي قاله ده غبي وأنا مش عايز أتعامل معاه ومستر محمود ساعتها هداه وقاله اللي أنت عايزه هيتعمل وساعتها استلم العربية يوم 22-7-2024، جالي السواق بتاعه عشان يسلمني العربية تاني ونصلح الحاجات اللي ناقصة وساعتها غيرنا للعربية الحماية للجزء الخلفي كله والاكصدام اللي قدام والسقف والفوانيس والشبكة وعملنا كل البيانوبلاك اللي في العربية والعزل الحراري.

سواق محمد سامي اتفق معايا إن في حد هيجي يستلم العربية

وقال المعتدى عليه من المخرج محمد سامي: ساعتها السواق بتاعه مؤمن اتفق معايا إن في حد هيجي يستلم العربية يوم الخميس 25-7-2025، وفي اليوم ده اللي هو امبارح احنا خلصنا شغل في العربية حوالي الساعة 10 الصبح واستنيت لحد الساعة 4 العصر محدش كلمني ولا جه يستلم العربية وأنا كلمت مؤمن قلتله مين هيجي يستلم العربية.

وأردف: مؤمن قالي إنه مسافر وهيشوف مين هيستلم العربية بداله وساعتها مدير أعمال محمد سامي اللي هو اسمه كريم كلمني وقالي إنهم النهاردة عندهم تصوير ومش هيقدروا يستلموا العربية وأنا ساعتها فهمته أن عليا التزامات مالية خاصة بدفع خامات اللي اتعملت في العربية للشركة وإنها لازم تتدفع النهاردة ولو جزء من تمن الشغل اللي في العربية.

ونوه المعتدى عليه من المخرج محمد سامي: وقلتله لو يحول الفلوس ديه وقالي إن محمد سامي مبيعرفش يحول فلوس وقالي إنه هيجيلي يوم الجمعة الساعة 11 الصبح يستلم العربية وأنا قلتله إن ده يوم إجازتي وإن ده صعب وفضل يتحايل عليا كتير لحد ما وافقت وأنا كنت قاعد امبارح في المركز لحد الساعة 9 بالليل تقريبا بظبط كام حاجة وكلمني كريم قالي إن هو ومحمد سامي في أكتوبر وسألني أنا موجود ولا لأ عشان يجوا يستلموا العربية وقلت له إني موجود وتلت ساعة كانوا عندي.

وتابع: وساعتها محمد سامي كان بيتكلم في التليفون بره المركز وكريم هو اللي دخل شاف العربة وكان عاجبه الشغل بس قالي إن في حاجتين ناقصين اللي هما فتحات السينسورز بتاعت العربية خلفي وأمامي كان العزل لسه مقفول عليهم بس مش مأثر على شغلهم والحاجة التانية كانت قاطعة غلط في الاكصدام الخلفي للفيلم العازل ولما محمد سامي خلص تليفونه ودخل كريم غير أسلوب كلامه.

اعتدى علي بألفاظ مش كويسة

وتابع المعتدى عليه من المخرج محمد سامي: بعدها، سامي شاف العربية وقعد يطلع فيها أي غلطات وبص لقى ترابية تحت الفيلم عند الرفرف اليمين وساعتها قالي ألفاظ مش كويسة وشتمني وساعتها أنا مردتش الشتيمة وقلت له بصوت عالي انت تشتمني أنا وفضل يشتم فيا برده وضربني برجله تحت الحزام ولبست فيا وساعتها كريم كان يحوشني أنا ويبعدني عنه وبيقولي اهدى وأنا قلتله اهدى هو اللي بيشتم وبيضرب.

وطلعنا بره المركز ساعتها محمد سامي ضربني بالبونية في وشي تحت عيني اليمين وساعتها الناس بتاعت المحلات اللي جنبي فصلوا بينا وبعدوني على المركز وهو كان ساعتها لسه بيشتم فيا وطلعوني برا المول بعيد عنه وبعدها رجعت المركز لقيته أخد عربيته ومشي ما دفعش ولا جنيه.