رسالة مؤثرة من شقيق محمد رحيم لـ تامر حسني بعد زلة لسان شيرين عبد الوهاب (صورة)
وجه الدكتور طاهر رحيم شقيق الراحل الملحن محمد رحيم رسالة مؤثرة للنجم تامر حسني وذلك بعد تدخله للتصالح بينه وبين شيرين عبد الوهاب بعد زلة لسانها على المسرح عن شقيقه.
وكتب طاهر رحيم عبر صفحته الرسمية "فيس بوك" "الوحيد اللي حاسس و عارف حقيقة كل اللي عديت بيه نفسياً انا و كل اسرتنا هو اخويا و اخو رحيم التالت الصادق الجميل ( تامرحسنى)".
رسالة مؤثرة من شقيق محمد رحيم لـ تامر حسني بعد زلة لسان شيرين عبد الوهاب
وأضاف" الله يسترك يا تامر على قلبك اللي مشوفتش زيه في حياتي متشكر يا راجل يا اصيل لوقفتك جانب كل العيله و إصلاحك لما افسدته الفتنه بينا كلنا ، متشكر لتكريمك لاخويا بايدك لاخر حباية رمل في تربته ".
وتابع" و فعلاً شيرين اختنا و انا زعلت عشان جالي الڤيديو في الأول جزء بتضحك فيه ، بس لما انت بعتلي الڤيديو كامل و شرحتلي عرفت انها حقيقي زلة لسان وانا متاكد من رأيك و ربنا يجازيها كل خير كفايه انها حاولت تكرمه وسط جمهورها ".
وأختتم"لكل محبين اخويا انا بقرأ كل كلامكم الحلو و الجارح اللي بيتقال ظلم ليا دون علم الدواخل و دون علم بنفسيتي ازاي انهارت واتصدمت بسبب فراق اخويا وانقسم ضهري وبقيت عايز اضم كل الناس و الفنانين في حضني عشان رد اعتبار اخويا في الدنيا بعد ما مات مقهور من تهميشه بقيت عايز اوصله و اقوله بص يا محمد بيحبوك ازاي بص مقدرينك ازاي و تاني ، انا اسف للجميع،شكراً يا تامر".
في نفس السياق حرص الفنان تامر حسني على الدفاع عن الفنانة شيرين عبد الوهاب وذلك بعد الهجوم عليها أثناء وصفها بتقديم سيئة جارية للملحن الراحل محمد رحيم أثناء إحياؤها حفل غنائي بالكويت الجمعة الماضية .
نشر تامر حسني ستوري على صفحته الرسمية عبر موقع التواصل الاجتماعي "فيسبوك" وعلق قائلا: "واثق إنها ذلة لسان من شيرين لأن شيرين من أكتر الناس اللي بتحب محمد رحيم الله يرحمه ومن أكتر الناس اللي عارفة قيمته لأنها فنانة كبيرة" .
وأضاف : "بالإضافة لأنها اعتذرت على المسرح في وقتها ونيتها كانت تكريم وطلبت الفاتحة من الجمهور، إنما بقى التوتر الشديد والصدمة اللي مستحوذة على الدكتور طاهر اخو رحيم مخلينه في حالة نفسية صعبة جدا، ربنا ما يوريها لحد مخليينه مش عارف يفكر بأحسن شكل لفراق أخوه اللي كان كل شئ في حياته، ارحموا من في الأرض يرحمكم من في السماء" .
جدير بالذكر، تألقت النجمة شيرين عبد الوهاب فى حفلها بالكويت فى أول ظهور لجمهورها بعد أزماتها الأخيرة مع طليقها حسام حبيب.
وتعرضت شيرين عبد الوهاب لموقف محرج أمام جمهورها بعد أن “لخبطت” بالحديث للجمهور وطلب الدعاء للملحن الراحل محمد رحيم.
وتذكرت شيرين عبد الوهاب الملحن الراحل محمد رحيم فى حفلها بالكويت وطلبت من جمهورها الدعاء له بالرحمة، مستعرضة أبرز الأعمال الغنائية التى جمعتهم.
وقالت شيرين عبد الوهاب فى لخبطة على المسرح،" يلا نقرأ الفاتحة لمحمد رحيم.. خلينا نعمل سيئة جارية.. يالهوي اتلخبطت قولتلكوا متخلونيش أتكلم في المايك أنا فضيحة".
