" لميس الحديدي" تكشف تفاصيل حادثة " أديب " وتوجه الشكر لأربعة شباب قاموا بإنقاذه

طمأنت  الإعلامية لميس الحديدي الجمهور على الحالة الصحية للإعلامى  عمرو أديب بعد تعرضه لحادث مروري مساء الثلاثاء الماضى  قائلة :  " عاوزه  أتكلم في موضوع مالوش علاقه بالشغل، عاوزه أطمن كل الناس اللي بتسأل علي عمرو بعد الحادثه الصعبه اللي تعرض لها مساء الثلاث الماضي ، انه الحمد لله بخير بشكل عام ربنا نجاه بأعجوبة الحقيقه لان العربيه اللي خبط فيها  و اللي وقفت فجأه ، كانت محمله بانابيب بوتاجاز فكان ممكن تنفجر في أي لحظه ،فالحمد لله علي كل شيء قدر و لطف زي مابنقول".

وتابعت " الدكاتره طمنونا علي حالته عموما، لكن هو لسه بيعاني من الام مبرحه  غالبا من الكدمات و الردود نتوقع انها تاخد بعص الوقت، وإنشاء الله يحاول يرجع لجمهوره قريبا بإذن الله، لكن هو محتاج يستريح شويه علشان يقدر يرجع تاني".

وقالت عبر برنامجها " كلمة أخيرة " المذاع على شاشة " ON" قائلة : " انا طبعا  ماكنتش حاقدر انزل الشغل أو  أكون معاكم إلا وانا مطمئنه عليه انه بيتماثل للشفاء و أن حالته تسمح اني اسيبه بعض الوقت  ،لان في مثل هذه الاحداث دوري كزوجة بييجي قبل دوري كإعلامية ".

ووجهت الشكر للجمهور ولكافة المسؤولين  في الدولة قائلة : " عاوزه اشكر كل الناس اللي سألوا علينا و عليه من  أصغر حد لأكبر حد ، من الجمهور البسيط اللي كان بيبعتلي رسائل ودعوات و شمع في الكنائس ، لأكبر مسئولين في البلد   باشكرهم جميعا  ،  زملاءنا الإعلاميين، الفنانين من كل الوطن العربى ، الدكاتره اللي كانوا بيكلموني ، مستشفي دار الفؤاد اللي انقذت عمرو في اللحظات الاولي ، ألفا سكان اللي دايما في ضهرنا ، و  طبعا أصدقائي و أصدقاء عمرو اللي ماسابونيش لحظه واحدهة.. باعتذار اني ماكنتش بارد علي الاتصالات ، لكن ممتنين  جدا لاهتمامهم، وحبهم  اللي حسينا بيه".

أكملت : " في وقت الصعاب  -زي ماعمرو دايما بيقولي-  اننا ماكناش بنزرع  في البحر .الحمد لله. وساعات وقت الأزمه بيكشفلك عن معدن الناس و عن حبهم و تقديرهم و خوفهم عليك  اللي يمكن ما بتحسوش في الوقت العادي.و الشكر الحقيقه مش للناس في مصر فقط و لكن في كل العالم العربي في الامارات و السعوديه و الاْردن و لبنان  ،و العراق"

 .

وكشفت لميس الحديدي  لأول مرة عن هوية أربعة شباب  كان لهم دور كبير في إنقاذ  زوجها الاعلامي عمرو اديب للمستشفى وإنقاذه    قائلة : " أنا هنا  سأخص بالشكر ٤ شباب بالأسم لانهم هم دول اللي نقلوا عمرو المستشفى بعد الحادث مباشره و فضلوا معاه لحد ماانا وصلت مباشره بعد الحلقه يوم الثلاث،  المهندس مصطفي عزب، الدكتور كريم النحاس، والدكتور طارق سلامه، والمهندسة داليدا . الشباب دول انا مااعرفهومش، لكنهم تصادف وجودهم في نفس مكان الحادث و نقلوه المستشفى و فضلوا معاه لحد وصولي و كملوا معايا لحد ما اتطمنوا عليه ..الشباب دول انا صممت اخد أساميهم علشان اشكرهم بنفسي ، فيه لسه ناس محترمه بجد ".