حازم إمام: "احنا عايزين المنتخب زى برشلونة.. ولازم نكسب جزر القمر"
الإثنين 29/مارس/2021 - 02:50 م
تحدث حازم إمام نجم منتخب مصر والزمالك السابق عن مباراة اليوم التى تجمع الفراعنة بمنتخب جزر القمر، الليلة فى تمام الساعة السادسة مساءً، على ستاد القاهرة الدولى، وقال عبر برنامجه "وان تو" عبر إذاعة أون سبورت إف إم، "مباراة لتبييض الوجه، لازم نكسب ونعمل مباراة حلوة وإحنا المصريين دماغنا صعبة فى الكورة، دايما عايزين المنتخب زى برشلونة".
وأكمل نحم الزمالك السابق: "روحنا كأس العالم قالك الأداء وحش كوبر لازم يمشى، صعدنا كأس أمم قالك الاداء وحش لازم نلعب كويس ونكسب، بس الناس بتنسى بسرعة ولو كسبنا انهارده والدورى رجع كل شىء هيتنسى".
وانتقل الثعلب الصغير للحديث عن محمود عبدالمنعم "كهربا" لاعب الأهلى، "مشكلة كهربا أنه لما بيتعصب بيطلع عن شعوره ويرجع بعدها عادى يعتذر، عمل كده فى الأهلى وقبلها فى الزمالك، لأنه باختصار لما بيتعصب مش بيشوف قدامه".
وأضاف حازم إمام، "كهربا محتاج يظبط رد فعله فى أول خمس دقائق بعد المشكلة، لازم يشوف حل لأن الغلطة الأولى غير الثانية والثالثة، وفى لاعبين كتير ضيعوا نفسهم بسبب دماغهم، واللى جاى مش قد اللى راح ياكهربا فلازم تظبط رد فعلك وتتعلم من أخطائك".
على صعيد متصل، ينتظم محمود عبد المنعم كهربا لاعب الفريق الكروى الأول بالنادى الأهلى، فى مران الفريق الجماعى، عقب مباراة المارد الأحمر مع المريخ السودانى مباشرة.
ويواجه الفريق الكروى الأول بالنادى الأهلى نظيره المريخ السودانى، بالعاصمة السودانية الخرطوم يوم 3 من أبريل المقبل، ضمن منافسات الجولة الخامسة من دور المجموعات ببطولة دورى أبطال إفريقيا.
ووقع مجلس إدارة النادى الأهلى برئاسة محمود الخطيب، عقوبة على كهربا بتغريمه 200 ألف جنيه وإيقافه عن المشاركة فى المباريات لمدة شهر كامل، بعد تصرفاته الغير أخلاقية مع الجنوب إفريقى بيتسو موسيمانى المدير الفنى للفريق بعد مباراة المارد الأحمر مع نظيره طلائع الجيش ببطولة الدورى.
