«كان أخف دم وأطيب قلب».. هالة صدقي تحيي ذكرى رحيل والدها

أحيت الفنانة هالة صدقي ذكرى رحيل والدها الراحل الدكتور صدقي، التي تحل اليوم، الأربعاء، الموافق 29 أبريل.

هالة صدقي تحيي ذكرى رحيل والدها

ووجهت هالة صدقي لوالدها كلمات مؤثرة معبرة عن مدى اشتياقها له، وكتبت من خلال حسابها الرسمي عبر موقع تبادل الصور والفيديوهات القصيرة إنستجرام، وعلقت:⁨ الذكري السنويه لوالدي الحبيب الدكتور صدقي كان اخف دم واطيب قلب وكان فنان بيحب يرسم علي القزاز ويرسم لوحات وبيحب المزيكا وبيحب الزراعه والجنيه كان فيها كل انواع الخضار المصري ، الله يرحمه.

في سياق آخر، كشفت النجمة هالة صدقي عن كواليس مشاركتها في مسلسل «بيبو» مع مطرب المهرجانات أحمد بحر الشهير بـ"كزبرة"، وقالت: ما ترددتش خالص إني أشارك في مسلسل بطولته شاب من الجيل الجديد، لأن إحنا خلاص شبعنا من فكرة إننا نثبت نفسنا أو ننتشر، إحنا نجحنا وعملنا اسمنا، لكن المهم دلوقتي إننا نكمل ونفضل موجودين، وده مش هيحصل غير لما نتواصل مع الأجيال الجديدة".

وأضافت: "أحمد بحر (كزبرة) نجم من الجيل الجديد ولازم ياخد فرصته، وأنا نفسي في يوم من الأيام وقفت قدام نجوم كبار واتعلمت منهم، فطبيعي أدي الفرصة لغيري".

وعن شخصية "إنعام" التي تقدمها، أكدت أنها لا تراها شخصية شريرة كما قد يعتقد البعض، قائلة: "أنا مش شايفاها شريرة خالص، بالعكس دي ست اتظلمت جدًا واتأذت واتحرمت من ابنها سنين طويلة، فطبيعي يكون عندها رد فعل قوي.. أي أم مكانها كانت هتعمل كده، هي بس بتحاول تحافظ على ابنها وعلى حقه".

وأشارت هالة صدقي إلى أنها تحرص دائمًا على التنوع في أدوارها، موضحة: "أنا دايمًا بحب أعمل أدوار مختلفة، لأن التكرار بالنسبة لي مشكلة كبيرة جدًا، ممكن أقبل عمل مش مقتنعة بيه قوي، لكن ما أقبلش أكرر نفسي".

وتابعت: "الجمهور دلوقتي بقى واعي جدًا وبيلاحظ كل حاجة، ولو حس إنك بتكرر نفسك بيقولك على طول، وده حقه طبعًا، علشان كده دايمًا بدور على حاجة جديدة أقدمها".

كما أكدت أنها تهتم بمتابعة آراء الجمهور عبر مواقع التواصل الاجتماعي، قائلة: "أنا كمان بقرأ آراء الناس وبهتم بيها جدًا، لأن السوشيال ميديا خلت الجمهور فاهم شغلنا كويس أوي وبقى عنده رؤية ونقد، وده في صالحنا".