أيمن سلامة يكشف تفاصيل إنقاذ زوجته من الموت
كشف المؤلف أيمن سلامة عن الحالة الصحية لزوجته مشيرًا إلى أنها أجرت عملية جراحية بالعمود الفقري، مطالبًا من جمهوره الدعاء لها.
أيمن سلامة يكشف تفاصيل إنقاذ زوجته من الموت
وكتب أيمن سلامة من خلال حسابه الرسمي عبر موقع التواصل الاجتماعي فيسبوك، قال: أصعب تجربة ممكن يمر بيها انسان.. الخميس الماضي اتصل بي ابني مروان يبلغني ان مامته تصرخ من ألم بساقها وانها لاتستطيع الوقوف ولا النهوض من مكانها واتفقنا علي طلب الإسعاف واتقابلنا في مستشفى الشروق بالمهندسين.
أضاف: في الاول شكوا انها جلطة بالساق لكن الاشعة والتحاليل في الطوارئ اكدت انه لأ، عملوا اشعة علي الضهر لقوا كسر بالعامود الفقري علما بأنها لا اتخبطت ولا وقعت ولا اي شئ، وقالوا لازم عملية فورا ، لكن التحاليل اكدت انها مش جاهزة للعملية، سيولة مرتفعة في الدم ونسب عالية في كل حاجة وزي ما اتقالي دي حالة ماينفعش تدخل عمليات، لكن استشاري المخ والاعصاب قال لو مادخلتش العمليات خلال 24 ساعة هاتكون معرضة لشلل تام ودكاترة التخصصات الاخري بيقولوا دي ماينفعش تدخل عمليات ونسبة خروجها لاتزيد عن 50 % وعشت ساعات من الحيرة ودخلتني الفنانة نهال عنبر - اللي بشكرها من كل قلبي - مع خمس دكاترة استشاريين ونفس الكلام.
تابع: بتوع المخ والاعصاب بيقولوا لازم عملية فورا وبتوع التخصصات الاخري يقولوا استحالة دي تدخل عمليات وبقيت مخير مابين تأجيل العملية لحد الحالة ماتتظبط وده معناه شلل مؤكد ومابين ريسك العملية اللي هامضي علي اقرار انها علي مسئوليتي وانهم بلغوني بالحالة كاملة وقالولي 50% تطلع سليمة وجالي الدكتور اشرف زكي اللي مهما شكرته لايمكن اوفيه حقه، اصر يكون جانبي وقالي استخير ربنا وبعد المغرب شد علي ايدي وقالي توكل علي الله، هي هاتكون بين ايدين ربنا، وربنا ارحم مننا جميعا ودخل العناية لزوجتي وشد من أزرها وقالها هاتقومي وافتكري كلامي ده كويس ودخلت العمليات وخرجت قرب الفجر وكلنا علي اعصابنا لكن ربنا فعلا ارحم مننا جميعا.
استكمل: هي حاليا في الرعاية المركزة لكن الحمدلله الحالة بتتحسن وشالوا اجهزة التنفس الصناعي والف حمد لك يارب، دعواتكم ان ربنا يتمم شفاها وربنا مايحط حد في الموقف اللي كنت فيه، ومرة تانية وتالتة بشكر الدكتور المحترم الانسان اشرف زكي اللي فضل جانبي ساعات طويلة وكان معايا خطوة بخطوة وبشكر الفنانة نهال عنبر اللي جت المستشفى فورا والفنان احمد سلامة والفنان علي كمالو اللي جم ايضا المستشفى وكذلك كل اعضاء مجلس النقابة / الصديق ايهاب فهمي / الصديق اشرف طلبة / الصديق ايمن عزب / الاستاذ منير مكرم وكل الزملاء والاصدقاء سواء اللي اتصل او جالي المستشفي .. نسألكم الدعاء لزوجتي.
