منة فضالي تكشف تفاصيل سرقة مجوهراتها ع يد خادمتها الأجنبية
كشفت الفنانة منة فضالي تفاصيل واقعة السرقة التي تعرضت لها داخل منزلها، وذلك عبر حسابها الرسمي على موقع التواصل الاجتماعي "إنستجرام"، موضحة ملابسات الحادث وما توصلت إليه بعد تحرير محضر رسمي بالواقعة.
وكتبت منة فضالي: "البنت دي بقالها عندي سنة وشهرين ومش معاها باسبور، وقولتلها هاتي باسبور أعملك إقامة، قالتلي محتاجة يومين إجازة، طلبت المكتب يجي ياخدها على أساس إنها هتروح تجبلي باسبورها، وإدتها تليفون علشان معهاش تليفون علشان أعرف أكلمها، أول حاجة محبتش حد يعرف عنوانها وخليت المكتب يوصلها في مكان بعيد".
وأضافت: "وواحدة جت أخدتها منهم وبعدين التليفون اتقفل وعملت بلوك ليا ولأمي، واكتشفنا بعدها إنها سارقة كل حاجة من البيت عن طريق أكياس القمامة السودة، وهي خارجة من عندنا كان معاها شنطتها الصغيرة، بعد كده لقيناها واخدة حلق وخاتم أمي الذهب وسلسلة ذهب كبيرة، وسارقة هدوم كتير من عندي وشنط غالية، كلمت المكتب وهما حاولوا يوصلولها، راحت مخليا واحدة تزعق معاهم، وعملت للمكتب بلوك".
وتابعت: "ودي صورها ببعض الحاجات اللي سرقتها من عندي، والست دي هي المسؤولة عنها، حاولت أتواصل معاها قفلت في وشي وعملت بلوك، روحت القسم وعملت محضر بالمسروقات، وأدتهم رقم باسبورها وإن شاء الله يعرفوا يجيبوها".
وأشارت منة فضالي إلى أنها علمت لاحقًا أن الفتاة تعمل مع شخص في نيجيريا له علاقة بالمخدرات، وأنها تعرضت لإصابات سابقة بطلقات نارية، مضيفة: "مش عارفة إزاي الناس دي بتدخل البلد، اللي زي دول لازم نحرص منهم".
كما أوضحت أنها لجأت لتوظيف عاملة أجنبية بعد تجارب سابقة مع عاملات مصريات لم تكن ناجحة، مؤكدة أن الهدف كان وجود شخص يساعد في رعاية والدتها أثناء انشغالها بالعمل.
واختتمت منة فضالي حديثها قائلة: "أنا بنزل الكلام ده وربنا يعلم أنا كنت بحب البنت دي قد إيه، لكن اكتشفت اتقي شر من أحسنت إليه، ولو حد بيتعامل مع الست دي خلي بالكم، وإن شاء الله القانون هيجيبلي حقي".
