محمد محمود لـ "مصر تايمز" : شخصية بيت بابا منضبطة جدًا ونجحت في الوصول لكل البيوت|خاص
قال الفنان محمد محمود إن شخصيته في مسلسل “بيت بابا” شخصية حقيقية موجودة في المجتمع، شخصية منضبطة جدًا، في زمن الانضباط فيه بقى عزيز جدًا ومبقاش زي زمان، خصوصًا في التربية والتعليم، وده سبب إن العمل لقى صدى كبير عند الناس من كل المراحل والفئات العمرية، الكبار والصغار أجمعوا على المسلسل.
وقال في تصريح خاص لـ "مصر تايمز" إن شخصية “أسعد أبو الصفا” رغم شدة الشخصية إلا إن الناس تفاعلت معاها بشكل كبير، وفيه ناس قالت: “ياريت التعليم كله يبقى كده”، ويرجعوا لزمن لما كان الأهالي بيقولوا للمدرس “اكسر واحنا نداوي”، لكن دلوقتي لو مدرس بص لولد مش عاجبه يروح يجيب بابي ومامي يهاجموا المدرسة.
وقال علشان كده الناس أجمعوا عليه لأنه دخل كل بيت، والأسر المصرية كلها توحدت حوله، وفيه ناس قالت ياريت النظام ده يرجع تاني، لدرجة إن في بوستات نزلت حاطة صورته بجانب وزير التربية والتعليم وقالوا ياريت أسعد أبو الصفا يبقى وزير التربية والتعليم.
وقال إن شخصيته في الحقيقة وشخصيته في المسلسل مش شرط يكون في اختلاف، لأنه ممثل بيقدر يقدم أي شخصية وعكسها، ومع ذلك هو عنده انضباط كبير جدًا، وبيحس إنه لو ما كانش ممثل كان ممكن يبقى رجل عسكري بسبب الانضباط اللي اتربى عليه من صغره، وبيحب إن كل حاجة يعملها تبقى صح، ومواعيده مظبوطة، وبيشتغل بإتقان وإخلاص، ودي الصفة المشتركة بينه وبين الشخصية.
وقال إن كل مشاهد العمل بالنسبة له صعبة، ولازم أي مشهد بيقدمه ياخد حقه كامل في الأداء.
