الناجي الوحيد من انهيار عقار جسر السويس: "عيلتي كلها ماتت ومش لاقي حتة أبات فيها"
الأحد 04/أبريل/2021 - 11:31 م
نشر الشاب فادي إيميل، الناجي الوحيد من انهيار عقار جسر السويس، استغاثة بعد فقدان أسرته بالكامل فى الحادث، إضافة إلى فقدان مسكنه ومأواه الوحيد.
وقال "فادي" عبر فيديو بثه على منصة التواصل الاجتماعي "فيس بوك": أنا فادي إيميل بولس.. الناجي الوحيد من انهيار عقار جسر السويس.. أبويا وإخواتي نادين ومونيكا وعمتي ومرات بابا.. كلنا كنا عايشين فى بيت واحد"، وتابع: "فجأة تحس أنك من غير أي حاجة حتى حد يطبطب عليك.. من غير بيت وأسرة أنت فعليًا لوحدك من غير أي حاجة".
وأضاف الشاب: "أختي الصغيرة نادين كانت هتتجوز في شهر 9 اللي جاي.. واعنا قاعد بدور فى الأنقاض عن الجثامين بتاعت أهلي كنت بشوف ناس بتيجي تاخد الجهاز بتاع أختي.. الموضوع مش سهل"، وأورد: "أتمنى إن ربنا ميوقعش حد في اللي حصل.. اللي حصل صعب.. الحياة دلوقتي بالنسبالي أنا من غير أي حاجة.. حتى مكان أبات فيه".
وتابع "فادي": "أنا بنام عند عمي دلوقتي.. بلاقي ناس بتكلمني تقولي ماتيجي تبات عندي ما تيجي أعملك أكل.. أنا محتاج الدولة تشوف حل في اللي أنا فيه.. بناشد الرئيس عبد الفتاح السيسي.. إحنا ولادك ياريس.. بعد إذنك شوفلي حل.. أنا دماغي وقفت عن كل حاجة.. ومحتاج حل ضروري وسريع من الدولة".
