فن وثقافة

محمد سامي عن تعرض مي عمر للهجوم: "في ناس عاوزة تبقى مكانها"

هبة الخولى

السبت 01/مايو/2021 - 09:13 م

تحدث المخرج محمد سامي، عن علاقته بزوجته الفنانة مي عمر، قائلا: "وهو أنا بعمل حاجة غير إني بكدب عليها كزوج مش كمخرج؟! وعلى طول بتقفشني لأنها أكتر واحدة حفظاني في العالم وبغير الكذبة 3 مرات وبعد كده بقول الصراحة .. من خاف سلم".

وأضاف سامي، في حواره مع الإعلامية بسمة وهبة مقدمة برنامج "العرافة"، الذي يعرض عبر شاشة "المحور": "وبالنسبة للتعامل معها في اللوكيشن، فقد تعاملت معها بشكل مختلف من كل فترة لأخرى، فقد كانت تظهر 10% من قدراتها أمام الكاميرا وكنت أنفعل جدا، لأنها كانت تؤدي في البروفات بشكل أفضل، وهذا كان يرجع إلى انعدام خبرتها".

وتابع: "حبي لها كان مخليني غيران عليها، وعاوزها تبقى أحسن حد، لأنها مراتي حبيبتي، وبالتالي كنت ببقى قاسي عليها جدا كنت بوترها جدا وبتعامل بطريقة غلط جدا وأزعق لها وأقول لها يا بنتي، وزمايلي كانوا يقولوا لي بالراحة عليها هي لسه بتبدأ، وبعد شوية الانفعال بقى يجي من منطقة تانية، ولما بقت شاطرة وبقى عندها خبرة الموضوع اختلف، ولما بقت نجمة بقيت أفرمل نفسي".

وواصل: "مرة كنا في باريس قالت لي جملة ضايقتني أوي، مش بتاخد بالك إنك في التصوير بتبقى أكتر في الانفعال عليّ لأني أقرب حد ليك، والموضوع ده بيضايقني وبتحرج لأننا في وسط الناس"، لترد عليه الإعلامية بسمة وهبة قائلة: "أصل مش هتسيب لك الأوردر وتمشي".

ورد عليها محمد سامي قائلا: "لأ طبعا متقدرش تمشي وتسيب اللوكيشن وده عشانها ومش عشاني، وعموما أنا رديت عليها وقلت لها أنا خايف عليكِ وعاوزك تبقي كويسة، لكن هي قالت لي انت خايف على الباقيين ومش بتتعامل معاهم زيي، ومن اليوم ده بقيت أتعامل معها بطريقة مختلفة، وخاصة دلوقتي بقيت أتعامل معاها باحتراف وزيها زي كل الممثلين .. هي إنسان محترف أوي وشاطر".

وحول تعرضها للهجوم، قال: "ده بسبب وجودي، الناس من الأول قالوا إن مي نجحت عشان جوزها، ومفيش حاجة اسمها كده، ومسلسل لؤلؤ كان بطولة مطلقة ليها ونجح في الوطن العربي كله، والناس اللي بتكتب على السوشيال ميديا حاجات كتير بتبقى حاجات لناس وناس حقيقية بس عاوزة تكون مكاننا".