"بخرزة زرقاء".. مها أحمد تعلق بعد أزمتها مع السقا وكرارة (صورة)

نشرت الفنانة مها أحمد صورة عبر صفحتها الشخصية على موقع التواصل الاجتماعى " انستجرام" لخرزة زرقاء وعلقت عليها قائلة " بحبها وبتفاءل بيها قوى.. بتبعد اى عين شريره. ايوه بخاف من الحسد قوى".

وكانت الفنانة مها أحمد ، قد نشرت فيديو عبر صفحتها الشخصية على موقع التواصل الاجتماعى فيس بوك بعد ما أثارته من منشور يتعلق بالفنان أحمد السقا وأمير كرارة ، للتوضيح لجمهورها قائلة" لما كتبت إمبارح كنت بعبر عن حاجة جوايا ، واستغربت جدا من الهجوم عليا .. ودى حكاية زى أى حكاية أنا بحكاية وعلشان كده عملت الفيديو ده للتوضيح علشان فى ناس بتصطاد فى الماية العكرة"، مضيفه حول تدوينتها التى اعتبرها البعض هجوم على الفنان أحمد السقا والفنان أمير كرارة " شئ طبيعى لما ألاقى حاجة تلفت نظرى ورد اعتبار بالنسبة ليا.. انا مش بشمت فى حد ولو بشمت كنت شمت فى نقسى انى قاعدة فى البيت".

وتابعت " جات عليا فترة أيام ماكنت بكبوظة كنت بشتغل كويس أوى .. وبعد ما عانيت من آلام فى الضهر والركب فعملت دايت قاسى جدا وخسيت .. وبعد ما خسيت قعدت فى البيت 3 سنين من غير شغل".

وقالت " قعدت فى البيت كتير وفضلت اسأل نفسى هو انا عملت حاجة .. لحد ما فى زميل قالى انتى عملتى صدمة لان الناس كانت حطاكى فى دور معين"

وكانت الفنانة مها أحمد، قد نشرت تدوينة عبر حسابها الرسمي بموقع التواصل الاجتماعي "فيس بوك"، اعتبرها الجمهور هجوم منها على مسلسل "نسل الأغراب" الذي قام ببطولته النجمين أحمد السقا و أمير كرارة.

وكتبت مها: "عوضي على الله دى الجملة اللى دايما بقولها لما اتصدم فاشخاص. الحكاية ياسادة نجمين عملوا مسلسل واتنجمت عليهم بنوته لسه ألف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلز الدعاية للمسلسل وهما راضيين رغم أن طول عمرهم مبيعملوش كده مع أى زميلة لهم اقربها أنا". 

أضافت:"النجم الأول بينى وبينه عيش وملح وزمالة رشحت فمسلسل بطولته وكان بيقنعنى بدور ولما وافقت بعتولى دور تانى معرفوش دور متعملوش واحده مبتدئة، المفروض أنه عارف قيمتى الفنية وعارف إني إضافه له اتهرب منى وموقفش جنبى وباعنى رغم أن الكل عارف انى زى أخته (ندل)".

وتابعت: " أما التانى كان فبداياته يتمنى يسلم عليا ويقولى يااستاذة نزلت من نفسى وقلتله مش هنشتغل مع بعض ماهى الحوجز مرة رد وقالى الدور بينادى صاحبه. طبعا محكلكوش قد ايه ندمت نفسى وعشت اسود ايام حياتى عياط واكتئاب. وقلت ( عوضى عليك يارب) .تمر الايام والاتنين يعلو ويتجمعوا مع بعض فمسلسل واحد( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه الدراما كامله لصالحها وهما (مخدماتيه للاستاذه) .يمهل ولا يهمل".

واختتمت كلامها: " ابدوا من جديد يااوفر تمثيل ياللى مابتقروش ياكومبارس جنب النجمة نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا ( عوضنا على الله ) .يارب متحوجنا لحد حتى ولو كان اققرب الناس لينا".