تسريب صوتي لوالد حسام حبيب: "ابني بيخطط يتجوز على شيرين ويسرقها"

وقال والد حسام حبيب في التسجيلات: "حسام النهارده انت بتدير اعمال شيرين، المفروض يبقى لك نسبة زي اللي ياسر خليل كان بياخدها، انا عارف ان حسام دماغه سم وهو ذكي جدًا ومش سهل، فا هو أكيد في دماغه حاجة ومأمن نفسه".

تابع معترفاً أن ابنه يسرق شيرين فقال: "هي شيرين عملاله توكيل بدليل انه معاه الفيزا أي الكارت فيزا، بتاعتها وبيقدر يسحب من حسابها، وعارف الرقم السري، بس هو بيروح يسحب الفلوس اللي هو عايزها".

كما أكد الأب أن أم حسام تكره شيرين وقال: "إيمان ام حسام مش بتحب شيرين، ايمان تنكة، وعاملة زي المليونير لما يفلس هي صرفت الفلوس اللي ابوها سابهالها وصرفت فلوس حسام، شيرين عايزة تقولها بتتنكي على اية يا روح امك ده انا عزماكي وهتسافري على حسابي والفندق على حسابي".

تابع يروي تفاصيل تلك الرحلة التي طردت فيها شيرين أم حسام وأخته، فقال: "حسام قالها مايصحش انتي كده بتطردي امي وبتطردي اختي، قالتله بقولك اية انا مش طايقاهم ولا طايقاك انت كمان، قالها طيب انا مسافر، قالتله في ستين داهية وطلقني قبل ما تمشي".

وفضح الأب التمثيلية التي قاموا بها جميعاً لمنع طلاق شيرين من حسام فقال: "المهم سافر خد امه واخته وجه، لقيت شيرين بتطلبني وبتقولي عايزة اطلق لو سمحت خليه يطلقني، عملنا عليها تمثيلية بقى ان انا جبت المأذون وانه كتب خلاص الطلاق بس انا قولتله استنى شوية لحد بس شيرين ما تهدى عشان لما تاخد القرار تاخده وهي هادية، قومنا كام يوم كده وصالحناهم على بعض وخلاص، ايمان مش بتحبها عشان شيرين بلدي، هي اصلا ايمان جدودها من تركيا ومن النمسا، وحسام تعليمه اجنبي لكن شيرين ماعرفش واخدة اية، دبلوم صنايع ولا مش دارسة مش عارف".

كما تحدث عن رغبته في أن يرزق بحفيد من حسام وقال: "نفسي يبقى عندي حفيد، انا بحب الاطفال جداً بالذات لما يبقى حفيدي، وبعدين نفسي اجيب عيل انا نفسي اخلف انا كمان".

وفضح خطة زواج حسام سراً من فتاة أخرى لأجل الانجاب، بدون علم شيرين، وقال: "لية حسام مايتجوزش بالسر مثلا، انا فكرت في خطة حلوة اوي، انا هقوله يجي يتجوز ويخلي مراته عندي، ومايقولش لشيرين ويبقى يجي ينام معاها هنا عندي، هو ساعات بيروح ينام عند امه في الرحاب في التجمع، المهم مرات حسام تقعد معايا هنا، وحسام يبقى رايح جاي من غير ما يقول لشيرين، لما تحمل وتخلف ويبقى عنده عيل فرحان كده بيه عايز يقولها يقولها مايقولهاش هو حر، هو مقتنع بكلامي وهو قالها انه هيتجوز عشان عايز يخلف".

أضاف: "انا شايف ان هي قضت على حسام، يعني من ساعة ما حسام عرفها مش داريان بنفسه، لا نزل اغنية ولا اشترك في فيلم ولا مسلسل، يعني هي سحبت كل وقته وخدت نجوميته وضافتها على نجوميتها هي، هي داست عليه وطلعت على حسابه هو".

كما أكد أن شيرين لا يمكنها الانجاب لتقدمها في السن وقال: "حتى لو مابتخلفش، واحدة خلاص عندها 39 سنة وقربت على ال 40 احتمال الخلف عندها ضعيف وهما بقالهم سنتين اهو ماخلفوش لية، هي سافرت امريكا بس ماقالوش عملوا اية في امريكا، كانت بتعمل رعاية صحية بتعمل تحاليل وبتكشف وبتعمل استشفاء في امريكا او بيسموها check up بتطمن على نفسها، وهو عمل كمان فحوصات عشان يشوف نفسه الخلفة كويسة والذكورة وكده، طبيعي هو طبيعي الحيوانات المنوية مظبوطة وسليمة، وزي الفل، هو يقدر يخلف".

وشكك بحب ابنه لشيرين قائلاً: ّمش عارف هل هو بيحبها بجد فعلا زي ما بيقول كده ولا هو ذكي وعارف ان هي شخصية متقلبة وممكن في اي وقت تطلب الطلاق وكده، هي شخصية ملولة جداً بتمل الدنيا ونفسها وولادها بتمل ملولة اوي، عندها جنون الفنانين ده فاهمة، انا من مصلحته يتجوز بنت صغيرة تخلف له وجميلة وعندها طموح".

وسخر من أصل شيرين قائلاً: "تحسي انه هو راقي وتحسي ان هي من بيئة مختلفة مش من نفس البيئة.. حصلتلي قبل كده موقف كان سخيف جدا جدا، واحدة عملت نفسها من فرنسا وهي اصلا من تونس ولا ماعرفش منين، واتكلمنا مع بعض واتصورنا وبتاع وراحت خدت سكرين شوت وبعتته لحسام، حسام خاصمني فيها ست شهور، طبعا هي كانت بستفزني بكلام وسخ عملت اية وشيرين اية، وانا زي الاهبل عمال اقول اي كلام انتي عارفة ساعة ….. الواحد بيهيس، وهي بتستدرجني لان هي عايزة تسجل ده وتبعته وتبتزه يعني".