واقعة المطار تتكرر.. شاب يتحرش بفتاة فى محطة الرمل (صور)

وقالت الفتاة في تصريحات خاصة لـ"مصر تايمز": "أنا بشتغل في شركة ملاحة في محطة الرمل.. وأنا مروحة امبارح الساعة 4 ونص روحت أركب كنت قاعدة جمب السواق أخدت بالي من إن ولد قاعد في تريسكل بيصور بنت". 

وتابعت: "ندهت على البنت قولتلها مدموزيل الولد ده بيصورك أنتي معاكي حد؟ قالتلي لا وكانت خايفة أوي 

قولتلها متخافيش ونزلت أخدت البنت وفيه ولد لاحظ الموضوع فجه معانا ومسكه والسواقين اتلموا لما لقوني بزعق وسألوني فقولتلهم ده بيصور البنات.. وفتحوا موبايله لقوا صور جسمها، فمسكوه وطلع أنه من القاهرة وبيشتغل هنا.. واخدوا الموبيل و فضلوا مستنيينه".

وأتمت: "البنت لو حابه تبلغ ده قرارها.. بس أنا قررت أصوره وأنزل الصور علشان يبقى عبره.. وقولت للبنت متخافيش أنتي مش لوحدك وفضلت تشكرني قولتلها أنا معملتش حاجة زيادة أنا حطيت نفسي مكانك".

‏وكانت "ريم"، نشرت عبر صفحتها الشخصية على موقع "فيس بوك": "النهاردة وأنا مروحة من الشغل في محطة الرمل أخدت بالي من واحد بيصور بنت من البنات اللي واقفين، قولتلها ولما لاقيتها لوحدها وخايفة قولت للسواق يستنى ونزلتلها وهزقته ولميت عليه الناس ومسكوه".

وتابعت: "فعلاً لاقينا أنه مصورها على موبايله، البنت فضلت تشكرني وهي يا حبيبتي مرعوبة وهتعيط.. البنت لابسه عادي مش لبس مُلفت مع إنه مش مبرر حتى لو لابسة إيه.. لو واحدة شكت إن حد بيصورها تتكلم وتاخد حقها، لو خايفة أطلبي مساعدة أي حد تلاقيه، ربنا يتوب علينا من القرف ده".