صفية العمرى: أنا خجولة جدا.. ومابعرفش أعمل دور لمجرد التواجد

كشفت الفنانة القديرة صفية العمري أنها لاترفض تقديم ادوار " دور ثان " في إطار تطور الاجيال والسماح لاجيال جديدة بإظهار مواهبها لكنها في نفس الوقت  تشترط أن تكون أدوار ذات هدف قائلة : " لازم يكون دور له هدف وأقول فيه حاجة مش أطلع عشان التواجد ولمجرد التواجد فقط ماقدرش أقل عن ده ". 

وتابعت في لقاء ببرنامج " كلمة أخيرة  " الذي تقدمه الإعلامية لميس الحديدي على شاشة " ON"قائلة : " حتى لو طلعت عشر دقائق أو خمس دقائق بس المهم يكون دور له هدف سواء أم أو جده لكن لازم   يكون دور له ثقل  .. مش مهم المساحة لكن الدور يكون محترم وله هدف".

وحول عزوف صناع الدراما على الاستعانة  بالنجوم الكبار القدامي وإهتمامهم  بالشباب فقط قالت : " أعتقد أن الدراما الان تصنع لجيل بعينه حتى الادوار المساعدة الان " هامشية ".

وتابعت : " حتى لو بيصنعوا دراما لجيل بعينه  فلازم في نفس الوقت " يضفروا " الاجيال مع بعضها البعض    هل فيه بنت ملهاش أم ؟ فيه فنانين كتيرة عظام وموجودة .. وبرة بيكتبوا للاجيال الكبيرة مخصوص   "

وحول مشاعر البعد عن الساحة وهل  تسبب لها وجعاً قالت : " أنا الي إخترت البعد لاني طول عمري بخلص شغلي وبرجع البيت على طول.. والحقيقة يمكن أكون مخطئة أو أكون لا أساير الوقت ولا الجو لكن في النهاية دي شخصيتي أني أكون " بيتوتية " ده طبعي مش بروح مناسابات إلا لو كانت مهمة بالنسبة لي ".

وقاطعتها الحديدي متسائلة : غريبة ولا خجولة ؟ لتجيب العمري " خجولة جداً  ..أنا قدام الكاميرا واحدة تانية خالص بنطلق بلا حدود بمجرد إنطفائها وعودتي للبيت بكون " أنا " زي مأنا مابعرفش أتغير وهفضل كده لحد ما أموت ".