أول تعليق من حلا شيحة على شطبها من نقابة المهن التمثيلية: هنيئا لي بشطبها لعضويتي

فى أول تعليق لها على تصريحات الدكتور أشرف زكي، نقيب المهن التمثيلية، بشطبها من نقابة المهند التمثيلية وردا على تصريحات الفنان تامر حسنى ، نشرت الفنانة حلا شيحة عبر صفحتها الشخصية على موقع التواصل الاجتماعى منشور قالت خلاله،" حابة أشكر كل الناس الجميلة علي رسايلهم الجميلة المشجعة."

وتابعت "حابة أشكر كل الصحافة اللي نشرت فتوى دار الافتاء النهارده اللي موقفي هو نفس موقفها اللي بيوضح إن التمثيل و الفن عموما زي اي مهنة في الدنيا حلاله حلال وحرامه حرام.. وأنا لا أحب ان اكون جزء من اي نوع من التطرف سواء باسم الدين او باسم الفن.. ولو نقابة المهن التمثيلية ترفض موقف دار الافتاء الواضح فهنيئا لي بشطبها لعضويتي.

وقالت "حبي للفن محدش يقدر ينكره ولا يزايد عليه.. انا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع اصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ".

وقالت " بالنسبة للكلام غير اللائق عن الأجر.. كل اللي في المجال شاهدين اني كنت اعتذر عن عدد كبير من الاعمال الفنية وكنت بقبل اجور اقل مما يتناسب معي تعاونا مع صناع العمل.. واصلا ما استلمتش الجزء الأخير من أجري في الفيلم لما أتأخر نزوله جدا و بدأت اتغير وأصلّح.. لأن بصراحة الكلام عن (أجر كبير) ضحكني".

واختتمت منشورها قائلة "انا فنانة بطبعي ومن صغري وكل اللي يعرفوني عارفين حبي للفن.. ودايما هعبر عن نفسي بمواهبي الفنية لما أحب لكن الجديد اني مش هاعمل كده على حساب اللي انا مؤمنه بيه بجد جوايا زي ما قولت مؤخرا.. انا لا اهاجم احد و لا احارب احد و لا انا افضل من احد و لا انصح احد قبل ما انصح نفسي اولاً و كلنا نخطئ مفيش حد معصوم من الخطأ …و بتمني الخير دايماً لكل الناس بما فيهم كل زمايلي و صناع العمل".