طالبة بالثانوية تستغيث بوزير التعليم: "ضربونى عشان اعترضت على الغش" (فيديو)

استغاثت فتاة تدعى "ريهام إبراهيم"، طالبة بالثانوية العامة، بشعبة علمى علوم بوزير التربية والتعليم، حيث نشرت مقطع فيديو لها على موقع التواصل الاجتماعى "فيس بوك"، مؤكدة تعرضها للضرب والإهانة من قبل زملائها وأولياء أمورهم؛ لاعتراضها على الغش الجماعى داخل لجنتها بمدرسة "أحمد عسكر الثانوية بنات" التابعة لإدارة العريش التعليمية بمحافظة شمال سيناء، مطالبة بالتحقيق في الواقعة.

وقالت الفتاة "ريهام" عبر مقطع فيديو على صفحتها الشخصية بموقع "فيس بوك": "أنا طالبة بالصف الثالث الثانوى شعبة علمى علوم وكان عندي امتحان كيمياء.. بمدرسة أحمد عسكر الثانوية بنات.. مديرية العريش التعليمية..اللى حصل أن اللجنة كانت هرجلة والبنات داخلين بموبايل والبنت محدش مسك تليفونها غير بعد الوقت بساعتين".

وتابعت: "أنا قومت واتكلمت مع المراقبين بخصوص الورق والموبايل اللى مع البنات فى اللجنة ومستفادتش بحاجة وكان فى خناق وضيعولى وقتى جدًا وكل دا عشان بقول بلاش غش باللجنة وعشان اعترضت على اللى بيحصل.. وخلصت وخرجت".

واستكملت: "طلعت من اللجنة البنات بيشتمونى وبيحسبنوا عليا.. وبعدها جت ولية أمر طالبة وبناتها وضربوني واتكاتروا عليا وشدوا هدومى"، مضيفةً: "أنا بناشد وزير التربية والتعليم ورجال الأمن والمسؤلين عن مراقبة لجان شمال سينا؟؟ عشان عايزة أعرف يتعمل فيا كدا ليه..كل دا عشان بطالب بمنع الغش باللجنة.. أنا عايزة حقى اللى حصل معايا ده ظلم أنا اضربت واتهانت واتشديت من هدومى فا عايزة حقى".

ومن جانبها، أكدت وزارة التربية والتعليم، أن الشؤون القانونية بالوزارة ستفتح تحقيقًا عاجلًا فى شكوى الطالبة والتأكد من مدى صحة كلام الفتاة "ريهام" عن وجود غش جماعى داخل اللجنة، وأنه إن ثبت ذلك سوف يتم اتخاذ كافة الإجراءات القانونية الصارمة ضد مسؤولى اللجنة.