أسماء مصطفى: "السرطان مرض مالوش كتالوج.. وحالتي معقدة"
الإثنين 23/أغسطس/2021 - 02:20 م
وجهت الإعلامية أسماء مصطفى اليوم الأثنين، رسالة مؤثرة لجمهورها ومتابعيها بعد إصابتها بمرض السرطان ، وذلك عبر حسابها الرسمي بموقع التواصل الاجتماعي "فيسبوك".
وقالت الإعلامية أسماء مصطفى، "مساء الخيرات عليكم وتحياتى وشكرى لكل الناس الجميلة على الصفحة، ردا على سوال بتساله كتير جدا هو انا ليه مش بحكى تجربتى وتفاصيل المعركة مع المرض اللعين مع ان فى ناس كتير عملت كده وان ده مهم علشان غيرى يستفيد، الاجابة ببساطة انى طبعا مقتنعة ومدركة باهمية ان مريض السرطان بيقدر يفيد غيره بتجربته وبيكون فعلا فيها امور كتيرة واحيانا معقدة جداً".
وأضافت "بس انا ما زالت فى هذه المحنة وحتى الان واللحظة معنديش جديد غير انى منتظرة انى مع الفحص الجاى باذن الله الاقى استجابة للعلاج واكيد باذن الله لما ربنا يكتبلى الشفاء من عنده هطلع واقول واتكلم معاكم كتير نفسى اكون مفيدة فعلا للناس بس حاليا مينفعش".
وتابعت، "الحاجة الثانية زى ما وضحت قبل كده ده مرض ملوش كتالوج فى ناس نفس حالتى وكانت ظروفهم افضل منى وفى العكس طبعا الشئ الاهم الى هنصح بيه وبكرره مفيش حالة زى الثانية حتى لو كانت نفس الاصابة لان جسمنا مش واحد ولا هنعانى نفس الاعراض لا انواع السرطان واحدة ولا العلاجات واحدة ولا الاجسام واحدة ، علشان كده بلاش تبادل خبرات الادوية لان دى يحددها الطبيب المختص فقط حسب كل شخص".
واختتمت، "وفى حالات معقدة زى حالاتى بتاخد اكثر من نوع علاج كيمو مع بعض وكل شوية تعديل رجاء نخلى بالنا نتوكل على الله وناخد بالاسباب وربنا كريم، وان شاء الله اقابلكم على خير وبعتذر على الايف فى الظروف الحالية صعب لانى عاوزاكم تشوفوني كويسة وده نقطة تانية اكيد هنتكلم بردوا عنها وهى نظرة الاخرين لمريض السرطان بعد ما المرض والكيمو يفترسوه وربنا يهونها من عنده".
