رضا البحراوي لـ"شاكوش": "مش هغلط فيك علشان أنا متربي وهاخد حقي بالقانون"
الأربعاء 01/سبتمبر/2021 - 12:54 م
كشف المطرب الشعبي رضا البحراوي، أنه يعتزم إتخاذ الإجراءات القانونية ضد الفنان حسن شاكوش، خلال الأيام القادمة، وذلك بعدما زعم البحراوي، تعرضه للسب من شاكوش.
وقال رضا البحراوي في فيديو نشره عبر صفحته بموقع "فيس بوك" موجهاً كلامه إلى حسن شاكوش، "أنا محترم وكان عندي استعداد أرد عليك، وأنا مش هينفع اشتمك أو أقول لفظ غلط، علشان جمهوري اللي بيحبني، أنت بقى مش محترم دي لنفسك".
وأضاف، "أنا في المهنة وانت لسه متولدش، أنا بامسك مايك وأنت لسه متولدش، أنا راجل نقابي، وبطالب نقابة المهن الموسيقية أن ترد لي حقي وحق فرقتي.
وكشف الناقد الفني هاني عزب ، تفاصيل الخناقة التى وصفها بـ" حرب شوارع" بين كل من حسن شاكوش ورضا البحراوي فى الساحل الشمالي.
وكتب "عزب" عبر صفحته الشخصية على موقع التواصل الاجتماعي " فيس بوك" مع نشر فيديو انفرد به ،" البداية كانت مع شاكوش اللي لما طلع علي المسرح كانت فرقة رضا موجودة علي المسرح .. شاكوش قرر إنه مش هيكمل فقرته إلا لما فرقة "البحراوي" تنزل من علي المسرح لإن كده كده بيغني "بلاي باك" وبالفعل طلبه اتنفذ وسط استياء من أعضاء الفرقة".
وتابع هانى عزب" قبل ما حسن شاكوش ينزل ويخلص فقرته قررت فرقة رضا البحراوي تطلع علي المسرح مرة تانية وده خلي فيه غضب كبير عند شاكوش اللي وهو نازل من علي المسرح وجه ليهم إشارات خارجة وبذيئة ومن هنا كان الرد بينه وبين فرقة رضا البحراوي وتبادلوا توجيه السباب.. وحاول هنا حمو بيكا التدخل في الموضوع وانهاء الأمر قبل ان تحدث كارثة حقيقة وخناقة شوارع في الساحل الشمالي".
واستطرد تفاصيل الخناقة قائلا" وصل رضا البحراوي الحفلة وعرف اللي حصل وأول حاجة عملها وجه التحية لفرقته الموسيقية وبدأ يغني وبعدها وقف الغنا وفضل ينادي علي شاكوش وقال "شاكوش فين.. مشي.. كنت عايزه والله.. نفسي فيه بس للأسف خد بعضه وجري..عايزه يدعي لحمو بيكا"
