"ملاهي الموت".. تفاصيل مصرع طفلة سقطت من "لعبة الإعصار" بالإسكندرية

ونشر مروان ناصر، ابن خالة الضحية تفاصيل الواقعة عبر حسابه الشخصي بموقع "فيس بوك" قائلًا: "أنا عاوز أجيب حق بنت خالي المقتولة.. طفلة عندها 12 سنة راحت الملاهي تلعب وتتبسط شوية وهي دلوقتي تحت التراب بسبب إهمال الملاهي.. الموضوع بدأ إنها كانت رايحة تتفسح في ملاهي في منطقة الراس السوداء".

وتابع: "دنيا بنت خالي الصغيرة الجميلة راحت تركب "لعبة الاعصار" مع الأطفال اللي من سنها وأصغر منها وإدارة الملاهي "قتالين القتلاء" مشغلين لعبة بكراسي متهالكة ومن غير نظام أمان كويس.. دنيا لما ركبت ربطوا رجلها بحبل في الكرسي عشان الكرسي اللي حظها جه عليه مش بيقفل للآخر". 

وأضاف ابن خالة الضحية: "طبعا محدش من الأهالي بياخد باله نهائي من الكلام دة لأن في شخص مسؤول عن اللعبة من الملاهي بيعدي يتأكد من إن الكراسي كلها مقفولة قبل ما يشغل اللعبة.. ودة اللي كلنا عارفينه يعني.. 

اللعبة اشتغلت بدنيا و طبعا مع لف اللعبة في الهواء دنيا وقعت".

وأوضح خلال منشوره: "تخيل أنت يعني إيه تقع طفلة من مسافة 10 متر عشان اللعبة تخبطها كمان في دماغها وهي تحت وتموت دنيا ونجري بيها على المستشفي نحاول نلحقها لكن كان كل شئ انتهي.. عرفنا بعد كدة من كل الناس أنهم بعد ما شالوا دنيا (جثتها) كملوا لعب عادي ولا كأن فيه أي حاجة حصلت".

وأورد: "أول ما جالي الخبر جريت على المستشفي أنا وأخوها.. لقيت ناس بيقولوا أنهم صحاب ملاهي فرحة.. حاولو يضحكوا علينا بكلام ان البت سليمة وكله تمام ومتبلغوش وحنعوضكوا وحندفع فلوس.. بعد ما المستشفي أكدت إن الحالة متوفية فعلا". 

واختتم كلامه قائلًا: "فيه صورة موجودة لدنيا سعيد وهي مربوطة من رجلها بحبل تخيلوا حد يتثبت في لعبة زي دي بحبل عشان الكرسي بايظ ومش بيقفل والملاهي عاوزة تشغل اللعبة على أقصي حمولة لها فبدل ما يعملوا صيانة لأ يستخدموا حبل ومحدش هياخد باله.. ساعدوني أجيب حق دنيا".