"لامس أجزاء من جسدها".. فتاة تتعرض للتحرش بميكروباص في الجيزة (صور)
الإثنين 25/أكتوبر/2021 - 09:11 م
تداول رواد موقع التواصل الاجتماعى "فيسبوك"، منشور لفتاة تدعي "شهد" يتضمن تعرضها للتحرش من أحد الأشخاص فى ميكروباص بالجيزة، وقيامها بالدفاع عن نفسها.
قالت "شهد": حصل معايا موقف انهارده من واحد فى عربية الجيزة.. وأنا قاعدة لقيت حاجة عماله تلمس فى ضهري وتمسك ف جسمي جامد وأنا مكنتش مستوعبة بيحصل إيه ومين عنده الجرأة دي لحد ما جينا نازلين بلف ضهري لقيت اللي قاعد ورايا فى الصورة دا معدي إيده بين الكرسي فضلت ساكتة مش عارفة انطق نزلنا والراجل اللي جنبه خد باله من نظرتي قالي هو عملك حاجه قولتلو اه قالي وواقفه تتفرجي".
تابعت: "روحت مشيت وراه ف ميدان الجيزة وفضل يعدي الطريق مرتين وأنا ماشية وراه بس مش عارفه أوقفه لحد ما لقيت اتنين شباب ماشين قولت لواحد منه ممكن توقفه دا حرامي سرقني راح طلع مسكه وأنا لقيت نفسي ماسكه شنطتي وبرزعها على وشه يجي سبع مرات وأكتر والراجل عمال يقولي شوفي شنتطك سرق منها ايه".
استكملت: "أنا مش عارفه اقول عمل ايه لحد ما قالي هو لمسك قولتلوا أه راح مسكه طلع عينه ضرب بعد ما مشيت خطوتين رجعت صورته وهما ماسكينه وحقيقي الموقف دا مش اول مره تحصل بس أول مره مفضلش قرفانه وهنام وانا مبسوطة إني خدت حقي وفخوره بإني مسكتش زي كل مره".
