محمد حسني في حوار لـ مصر تايمز: مش كل الحياة سكر ولا كلها ملح.. من المفترض عرض مسلسل "المماليك" خلال الشهر القادم.. والدي ووالدتي الله يرحمهم وقفوا معايا وتعبوا كتير
الإثنين 29/نوفمبر/2021 - 09:30 م
محمد حسني فنان استطاع أن يحفر اسمه بنفسه وبمجهوده وموهبته المتنوعة، يعرف كيف يتقن أي دور يجسده بإبداعه المميز، على الرغم من أنه لم يأخذ حقه الكافي ولم يؤد بطوله كامله لكنه يؤدي بجوار النجم البطولة الحقيقية.
دائما يخطف أنظار الجميع بأدائه الاستثنائي، اشتهر وأحبه الجميع من بداية ظهوره وتوالت نجاحاته حتى اللحظة، حتي أصبح له رصيد مليء بالدراما والسينما، فهو فنان عاشق للفن منذ صغره، دائما يبهر الجميع باختلاف أدواره سواء تراجيدي أو كوميدي.
بماذا تصف الفنانة عبلة كامل من خلال تعاملك ومشاركتك معها في مسلسل سلسال الدم؟
الفنانة عبلة كامل مدرسة كبيرة جدا، وبالتأكيد مفتقدينها حتى على الشاشة، ممثلة كبيرة وقديرة وإنسانة فوق الوصف، كان ليا الحظ إني أكون قريب منها في تصوير مسلسل "سلسال الدم"، فنانة تهتم بكل التفاصيل مش ليها بس ليها ولكل زمايلها إنسانية إلى أبعد الحدود بتهتم بكل اللي حواليها وتحاول أن تساعدهم، ربنا يرجعها بالسلامة ونشوفها قريب على الشاشة.
هل مهنتك كفنان تأخذك من أسرتك؟
المهنة صعبة ممكن أكون في أوردر تصوير يمتد إلى 18 أو 24 ساعة كاملين، لو مشغول في أكثر من عمل بصورة ممكن أرجع البيت كل يومين أو 3 مرة، هي مهنة زي كل المهن لكنها شاقة صعبة ده بيجي على الأسرة لكن هما متفهمين طبيعة المهنة وبقدر الإمكان بحاول حتي لو مفيش أي التزامات لازم أتواجد في المنزل عشان أعوض ده هي مهنة صعبة ربنا يكون في عون الفنانين.
هل يوجد أعمال جديدة تحضرها لجمهورك؟
حاليا بجهز موضوع قومي عن بطلات مصر كانوا كسبوا ميداليات في الأولمبياد، بصور أيضًا في آخر حدوتة من حواديت مسلسل "زي القمر" حدوته بعنوان "مفترق طرق" إن شاء الله برضو بجهز حاجة لرمضان مع الأستاذة "مى كساب"، في عدة تحضيرات ربنا يسهل وتعجب الناس.
ما هو أصعب دور قدمته؟
أوقات الصعوبة تكون في الدور الكوميدي في "الكبير" مأمور المزاريطة كان دور صعب شوية لأن الغرض من العمل نفسه إنه يحقق بسمة أو يضحك الناس فتكون الكوميديا سهلة وصعبة، صعبة لأنك بتضحك شعب دمة خفيف وشعب كوميديان أساسا بطبيعته إنك تضحكه بتدور على حاجات صعبة جدا عشان ترضيهم، الأدوار الكوميدي دايما بيكون فيها شوية صعوبة.
من الذي تعتبره من الوسط الفني أخ لك؟
جميعهم، أي حد نشتغل مع بعض بيحصل كيمياء وعلاقة كويسة كلهم أصحابي وإخواتى وكلهم ناس محترمين، لكن أقربهم ليا السيناريست "وليد يوسف" لأنه ده صديق وعشرة عمر بلدياتي من المنصورة وزميل "مسرح الجامعة" ومشوار طويل واخدينه مع بعض من قبل مسلسل "الدالي" يمكن ده أقربهم ليا، لما يكون في شغل مع زمايلي وكلهم صحابي وحبايبي ناس محترمة كلها والحمدلله الوسط فيه نماذج كثيرة جدا إخوات وأصحاب.
هل تعرضت لظلم فني؟
في أوقات آه لكن ربنا دايما يوزنها ويعدلها من عنده، وارد إنك تتعرض لظلم وإنك تاخد حقك ده وارد في مشوار أي إنسان مش كل الحياة سكر ولا كلها ملح، الحكاية كلها في ظلم إنت تنتظر عدالة السماء عدالة ربنا يصلح الحكاية ويديك حقك، الحمد لله على كل شيء والحمدلله في نهاية المشوار بتبقى شايف إنك حققت حاجات كويسة وربنا وقف معاك.
أول مشاركة لك كانت في مسلسل الرقص على سلالم متحركة من الذي رشحك للدور؟
أول مشاركة كان أول "سيت كوم مصري" اسمه "شيكورونة" وكان بطولة الله يرحمة وائل نور والأستاذ صلاح عبدالله وميرنا المهندس ده كان أول عمل شاركت فيه في "التلفزيون" كنت طالب في الجامعة وكان رشحنى صديقي السيناريست وليد يوسف لأن هو كان كاتب الورق، مسلسل "الرقص على السلالم" كان بعد ذلك كان الأستاذ محمود بكري المخرج مرشحني للحكاية.
أكثر فنان تحب أن تعمل معه والسبب؟
بحب كريم عبدالعزيز وبحب أيضا أحمد مكي الشغل معاهم مريح، بحب محمد لطفي جدا بنصور مع بعض "المماليك" من المفترض أن يتم عرضة خلال الشهر القادم، لأن في صداقة بتبقي الدنيا سهلة ويبقى الجو "أخوي" جميل وصداقة، أيا كان الشغل صعب أو في أزمات أو تعب بيعدي مع الناس دي بسهولة كواليسهم كويسة جدا.
والأستاذة عبلة كامل أيضا والأستاذ رياض الخولي بيبقي اليوم نفسه بيخلص بسرعة مبتحسش بتعب أو مجهود لأنك وسط صحابك بيبقي في كلام و ضحك في يوم كامل تقضيه معاهم بشكل كويس، الحياة لطيفة والكواليس كويسة بسبب جو الصداقة بيعدي اليوم بشكل كويس.
ما الاسم الذي يندهك به الناس في الشارع لدور قدمته؟
اسم "عاصم" كان في مسلسل "الدالي" في ناس بتنده "بنجاتي" كان في "سلسال الدم" و"مأمور المزاريطة" دايما الحمدلله لما بيكون فى حاجة ناجحة الشعب لأنه شعب مثقف جدا وشعب فنان بجد وبيعرف يلقط ومؤخرا دور "ممدوح" كان من حدوتة في "زي القمر" كان دور شرير بيندهو ويشتموا يقولوا "كده تعمل ف اختك كده" ده تواصل كويس يدل على أن الناس بتتفرج كويس والناس برضو بتستوعب وبتعرف تقيم الحمد لله علي كل شئ.
لو اخترت مهنة غير التمثيل كنت اخترت إيه؟
ممكن أشتغل "رائد فضاء" أو أي حاجة في الفضاء، أشوف إيه المتاح لسة محدش عمله واشتغل في الفضاء أو مثلا "سواق صواريخ" عشان أطلع بعيد وبراحتي، واشتغل في منطقة لوحدي.
ما رأيك في قرار هاني شاكر بإيقاف بعض مطربي المهرجانات من الغناء؟
رأيي في موضوع الأستاذ هاني شاكر دي نقابة لها قوانينها المعروفة من يخالف القوانين من حقه يوقفه ده كيان قائم بنفسة لكن بالنسبة للمهرجانات كلنا متفقين إن الذوق العام لازم يتحسن، يتحسن عن طريق الفن لو الناس دي بتقول حاجة ولهم جمهور نعملهم لجان لاختيار الكلمات لكن منخسرش القاعدة بتاعتهم ولا نخسر إن ليهم مستمعين بجد بس نظبط ونقيم ده ونعرفهم يقيموا إزاي أو يحسنوا ادائهم.
عندي اقتراح الكلام اللي بيعملوه الرقابة تكون عليهم أعلى وأكثر بحيث نشوف هما بيقولوا إيه ويحصل فلترة أو يحصل تظبيط للحكاية طالما الناس بقوا موجودين وبقي عندهم جمهور منخسرش ده ولا نخسرهم، الحكاية كلها يبقي في شوية انضباط في السوق والكلام لأن في الأخر لينا أطفال بتسمع يلزمنا الذوق العام شكلة كويس مش وحش.
دخلت مجال التمثيل بسبب حبك للتمثيل وموهبتك أم الصدفة؟
دخلت التمثيل مش بالصدفة خالص الحكاية كان من "مسرح الجامعة"، اشتركت مع فريق الكلية بالصدفة أو بالهزار لكن مفيش حد بيدخل حاجة بالصدفة ممكن ميكونش مخطط ليها بس هي بتبقي جواة ووقت ما يلاقيها في مكان بيقوم جاري عليها، كانت البداية في مسرح الجامعة "جامعة المنصورة" وكان مسرح الجامعة في حد ذاته أكاديمية كبيرة بالنسبالي اكاديمية تدريس فن بشكل كبير كان عندنا مخرجين كويسين كان عندي فريق مسرح قوي أيضا.
بعد اختيارك لأول دور قدمته من أول شخص أخبرته هذا الخبر؟
أول شخص كانت الله يرحمها "أمى" كنت دايما "أمي وأبويا" الله يرحمهم لما يكون في جديد أو في دور كنت بجري عليهم عشان افرحهم لأن دول أكتر حد في الدنيا كان يستحق إني أفرحه لأنهم تعبوا كتير ووقفوا معايا بشكل كويس الله يرحمهم ويحسن إليهم دايما كنت ببقي مبسوط إنهم يشوفوا حاجة ويفرحوا بفرحهم بأي جديد وكانوا أول "نقاد" ليا كانوا أكتر حد يستحق إني أبلغه خبر كويس.
ما رأيك في برامج المقالب؟
هي المقالب حلوة في حد ذاتها لكن يبقى مقلب حلو مش حاجة سخيفة ولا حاجة عايز تضحك الناس بالعافية لأن ده شعب ضحوك جدا شعب خفيف الدم عنده الإفيه حاضر شعب بيفهمها وهي طايرة زى ما بيقولوا بالبلدي، فإذا هتعمل مقلب بشياكة يضحكنا تمام لكن مقلب بسخافة أو في رزالة أو في عنف أو يقلب المقلب شتايم وألفاظ ده لا، لكن لو في مقلب أو في نكتة دمها خفيف هنضحك كلنا من غير ما حد يذقنا.
من وجهة نظرك هل الفن يحتاج لواسطة؟
الفن كان في الأول بالموهبة والأساس في الحكاية موهبتك، حاليا في وسائط فيها مجاملات كتيره جدا مش هنكر ده عشان نكون صرحا لكن الأول كان في فترة الفنان ده بموهبته وموهبته بتقدمه في المشوار أو ترجعة تاني وكان في نماذج كثيرة جدا وما زالت على الساحة، ناس طالعة بموهبتها، البني آدم اللي بيمشي بموهبته بثقافته و بدراسته بيكمل وبيكون نجم.
لكن الشيء الهش وتواجد بالواسطة أيا ما كان كبر وأيا ما كان حجمة هيجيله وقت ويخلص لأن الناس مستنية كل يوم جديد أنت معندكش جديد والواسطة مش هتخليك تعمل جديد فالموهبه والدراسة والقراءة والثقافة ده كله بيعمل فنان لكن الواسطة مبتعملش حاجة هتساعدك يوم مش هتعرف تساعدك تاني فلازم موهبتك اللي هتساعدك.
