ميدو يهاجم مروان حمدي: "أنت لسه معملتش حاجة علشان ترد على نجوم مصر التاريخيين"
السبت 04/ديسمبر/2021 - 11:45 م
انتقد أحمد حسام ميدو، نجم نادي الزمالك الأسبق، مروان حمدي، مهاجم منتخب مصر ونادي سموحة، بعد المستوى المتواضع الذي ظهر عليه في مباراة مصر والسودان التي أقيمت بملعب "974"، ضمن منافسات الجولة الثانية لدور المجموعات بمسابقة كأس العرب المقامة حالياً في قطر، وانتهت بفوز مصر بخماسية نظيفة.
وقال ميدو في تصريحات عبر برنامجه "الريمونتادا"، "كنت أتمنى كما قام مروان حمدي بالرد على السوشيال ميديا أن يرد في الملعب.. العب وهات جولين وطلع لسانك للناس كلها.. لكن بتكتب كدة ومفيش حاجة في الملعب.. أنا أطالب كابتن وائل جمعة بتوقيع عقوبة عليه".
وأضاف، "تصريحات مروان حمدي علي مواقع التواصل الاجتماعي غير موفقة، الناس اللي انت بترد عليهم دول يا مروان نجوم مصر التاريخيين، انت لسه معملتش حاجة، وكنت أتمني أن يكون ردك في الملعب، لكن هذا أيضا لم يحدث".
وكان مروان حمدي هاجم منتقديه عقب مباراة مصر ولبنان عبر حسابه الرسمي بموقع "انستجرام"، قائلاً، "80% من اللي بيطلعوا في البرامج الرياضية مبيفهومش حاجة وبتوع لقطة وبس ومحدش بيركز ولا بيراجع كلامهم إلا القليل".
وأضاف: "اللي منهم بتاع لقطة ومعندوش مبدأ واللي بيطلع يضحك الناس وفاكر نفسه في مسرح مصر، وكام إعلامي يطلع يسخن ده على ده والناس على بعض عشان يجيب كام مشاهدة وشكرا".
تابع: "الإعلام الرياضي مجاش إلا من رحم ربي، طبعا أنا عارف أن منكم لو معلمش الشوتين دول مش هيجاب في حتة بس أعملوها بطريقة محترمة وشيك شوية، وفي آخر كلامي زي ما بتعملوا دي وجهة نظري".
