كوكا وميدو أحدث حلقات مسلسل "خناقات نجوم الكرة"

اندلعت اليوم الجمعة، أزمة كبيرة بين أحمد حسن كوكا مهاجم قونيا سبور التركي، وأحمد حسام ميدو نجم نادي الزمالك الأسبق، بعدما بات كوكا ثاني أفضل هداف في أوروبا برصيد 99 هدفاً خلف النجم المصري محمد صلاح المحترف ضمن صفوف ليفربول الإنجليزي.

وشن أحمد حسن كوكا، مهاجم قونيا سبور التركي هجوماً عنيفاً إلى أحمد حسام ميدو، نجم نادي الزمالك الأسبق، بعدما حاول الأخير التقليل من إنجازاته وأرقامه على مدار مشواره الأحترافي في أوروبا، حيث وصفه ميدو بـ"المتواضع"، وهي الكلمة التي أشعلت غضب كوكا.

وقال ميدو رداً على أحد الصحفيين، "مهاجم متواضع لا يصلح للمستوى الدولي حتى ولو احرز 1000 هدف"، ليرد كوكا الذي وصل لهدفه الـ 99 في أوروبا عبر صفحته الرسمية بموقع "تويتر"، "مهاجم متواضع؟ اولا هو انت، أصلا مين طلب رأيك؟ ثانيا انت مبطل كوره وانت عندك 29 سنه وكل الناس عارفه ليه، ثالثا لو رقم الاهداف الي انا جايبه شايفه قليل ماجبتوش انت ليه؟، مع ان اللي بيلعب في نادي أكبر فرصه بتكون اكتر في التسجيل، رابعاً حاولت تبقي مدرب ومبتكملش شهر في أي نادي".

وأضاف، "خامسا بتحاول تبقي اعلامي وتتكلم عن ده وده عشان تبقي تريند بأي شكل ، اي حاجه عايز تدخل فيها ، ده حتي صلاح في اول مشواره كنت بتتكلم عليه وحش ، الحقد عالي اوي عندك من زمان وانت بتتكلم وحش عني"، متابعاً، "وأنا عارف ان اكبر غلط اني ارد عليك وأنت فاضي وعندك برنامج تتكلم فيه كل يوم بس انا برده مش هيهدني كلامك وهفضل في طريقي ، مركز في مستقبلي ومش عايز حاجه من الناس بعد مبطل كوره و بعد لما اموت غير السيره الحلوة".

ورد ميدو على حديث كوكا، "عمري ما لعبت في دوريات الالاضيش اللي انت بتلعب فيها.. مصر كلها بتقول انك لاعيب على ماتفرج مش انا بس وتاني انت عارف كويس انت كنت بتروح المنتخب ليه، عمري ماروحت المنتخب علشان مناسب حد مهم.. أنت عارف كويس أنت كنت بتروح المنتخب لسه.. رد في الملعب حاول تروح المنتخب.. أنت لاعيب تعبان وكل مؤهلاتك نسبك وأنت عارف كويس"، مضيفاً، "هتسيب سيرة حلوة ازاي وانت مابتعرفش تلعب مفيش حد هيجيب سيرتك لا بالحلو ولا بالوحش".

هذا التلاسن لم يكن الأول الذي يجمع بين نجوم الكرة في الفترة، وهو ما نستعرضه سوياً خلال السطور القادمة..

نشبت خلال الأيام مشادة كلامية بين الثنائي إبراهيم سعيد وأحمد عيد عبد الملك، عبر موقع التغريدات القصيرة "تويتر"، بسبب مصطفى فتحي لاعب الفريق الكروي الأول بنادي الزمالك.

وكتب ابراهيم سعيد عقب مباراة الزمالك وغزل المحلة التي أقيمت بـ"ستاد القاهرة"، وانتهت بفوز الزمالك برباعية نظيفة، "ياريت الشباب بتوع الاحصائيات تعمل لمصطفي فتحي اللاعب الدولي !!! عمل ايه في ماتش غزل المحلة غير الهدف والجول فاضي واضاعة فرصة الانفراد بجول بن شرقي اداء لا يرتقي لاعب في الزمالك".

ورد أحمد عيد عبد الملك قائلاً، "الكابتن الدولي مش عاجبه حد و بيقطع في كابتن من كباتن الزمالك ومركز معاه اووي ياريت تريح وتهدي ده قد ولادك يا جدع انا عارف انه اكل عيش بس مش كدة .. اه صحيح انت جيت الزمالك مخدتش بطولة ومشي".

واستعان إبراهيم سعيد بفيديو لأحمد عيد عبد الملك لكشف حقيقة انتمائه لنادي الزمالك، وكتب "كابتن أـحمد عيد رمز الانتماء فعلا لنادي الزمالك، بيقول معنديش أي مشكله العب للنادي الاهلي وجمهوره الجميل ومع الصرح الكبير ودي اضافه لاحمد عيد انه يلعب للاهلي وجماهيره تحرك الصخر.. حبيبي والله.. مفيش حديقه باسمك خلاص كده.. انتماء انتماء مفيش كلام".

تحدث رضا عبدالعال، نجم ناديا الأهلي والزمالك الأسبق، عن ما تردد حول تدخل محمد صلاح، نجم منتخب مصر ونادي ليفربول الإنجليزي لفرض بعض الأسماء على حسام البدري وهيكتور كوبر مدربي "الفراعنة" السابقين، في إشارة إلى اللاعب عمر جابر.

وقال رضا عبد العال، في تصريحات لبرنامج "البريمو"، "لو الكلام اللي بيتقال ده حصل يبقى عليه العوض في الكرة وتبقى فضيحة بجلاجل، أنت يا صلاح مش عايز تيجي تلعب في منتخب مصر براحتك، إنما متفرضش حد على حد علشان ده صاحبك، إحنا مش قاعدين على قهوة".

رد محمد صلاح على تصريحات رضا عبدالعال، نجم الأهلي والزمالك الأسبق، بشأن تدخله في اختيارات قوائم المنتخب الوطني.

وقال محمد صلاح في تصريحات لبرنامج "الحكاية" من تقدم الإعلامي عمرو أديب، "كابتن رضا عبدالعال أنا بحبه وبتفرج على حاجات كثيرة له، هو شخصية كويسة وبحبه، لكن الكلام مش منطقي اني بجيب الناس في المنتخب، علاقتي بجميع اللاعبين كويسة، احنا مع بعض من 10 سنين، مصلحة مصر فوق أي حد، محدش يقدر يعمل اللي هو عايزه، ومينفعش احط مصلحتي قبل المنتخب".