ميدو: "الكرة ما فيهاش صعبنيات.. والقنوات بتدفعلنا فلوس عشان نقول رأينا"

تحدث أحمد حسام ميدو، نجم نادي الزمالك الأسبق، عن انتقاده لمستويات عدد من اللاعبين خلال الفترة الماضية، قائلاً، "شغلتنا والقنوات اللي بنشتغل فيها بتدفعلنا فلوس عشان نقول رأينا.. وعلى اللاعبين الرد في الملعب".

وأضاف ميدو عبر برنامجه "الريمونتادا" الذي يذاع على قناة "المحور"، "الكرة ما فيهاش صعبنيات ومحدش هيطبطب عليك وانتقاد اللاعبين أمر طبيعي، أنا أكتر واحد اتقطع انتقادات وأنا بلعب وأنا مدرب، وأتقال في حقي كلام كتير بالغلط".

وتابع، "في بطولة كأس الأمم الإفريقية اللي اتلعبت في تونس 2004، أنا شيلت البطولة لوحدي، الانتقادات كانت نارية، وقالوا ميدو كان بيجيب بنات في المعسكر، الناس كلها قطعتني مردتش على حد فيهم انتقلت إلى مارسيليا وتوتنهام وتطورت وسجلت أهدافا وقدمت مستوى مميز ورديت في الملعب". 

وكان أحمد حسام ميدو، انتقد في الفترة الأخيرة، مروان حمدي، بسبب تواضع مستواه مع منتخب مصر في بطولة كأس العرب التي أقيمت في قطر، بجانب أحمد حسن كوكا مهاجم قونيا سبور التركي.

واندلعت أزمة كبيرة بين أحمد حسن كوكا مهاجم قونيا سبور التركي، وأحمد حسام ميدو نجم نادي الزمالك الأسبق، بعدما بات كوكا ثاني أفضل هداف في أوروبا برصيد 99 هدفاً خلف النجم المصري محمد صلاح المحترف ضمن صفوف ليفربول الإنجليزي.

وشن أحمد حسن كوكا، مهاجم قونيا سبور التركي هجوماً عنيفاً إلى أحمد حسام ميدو، نجم نادي الزمالك الأسبق، بعدما حاول الأخير التقليل من إنجازاته وأرقامه على مدار مشواره الأحترافي في أوروبا، حيث وصفه ميدو بـ"المتواضع"، وهي الكلمة التي أشعلت غضب كوكا.

وقال ميدو رداً على أحد الصحفيين، "مهاجم متواضع لا يصلح للمستوى الدولي حتى ولو احرز 1000 هدف"، ليرد كوكا الذي وصل لهدفه الـ 99 في أوروبا عبر صفحته الرسمية بموقع "تويتر"، "مهاجم متواضع؟ اولا هو انت، أصلا مين طلب رأيك؟ ثانيا انت مبطل كوره وانت عندك 29 سنه وكل الناس عارفه ليه، ثالثا لو رقم الاهداف الي انا جايبه شايفه قليل ماجبتوش انت ليه؟، مع ان اللي بيلعب في نادي أكبر فرصه بتكون اكتر في التسجيل، رابعاً حاولت تبقي مدرب ومبتكملش شهر في أي نادي".

وأضاف، "خامسا بتحاول تبقي اعلامي وتتكلم عن ده وده عشان تبقي تريند بأي شكل ، اي حاجه عايز تدخل فيها ، ده حتي صلاح في اول مشواره كنت بتتكلم عليه وحش ، الحقد عالي اوي عندك من زمان وانت بتتكلم وحش عني"، متابعاً، "وأنا عارف ان اكبر غلط اني ارد عليك وـنت فاضي وعندك برنامج تتكلم فيه كل يوم بس انا برده مش هيهدني كلامك وهفضل في طريقي ، مركز في مستقبلي ومش عايز حاجه من الناس بعد مبطل كوره و بعد لما اموت غير السيره الحلوة".

ورد ميدو على حديث كوكا، "عمري ما لعبت في دوريات الالاضيش اللي انت بتلعب فيها.. مصر كلها بتقول انك لاعيب على ماتفرج مش انا بس وتاني انت عارف كويس انت كنت بتروح المنتخب ليه، عمري ماروحت المنتخب علشان مناسب حد مهم.. أنت عارف كويس أنت كنت بتروح المنتخب لسه.. رد في الملعب حاول تروح المنتخب.. أنت لاعيب تعبان وكل مؤهلاتك نسبك وأنت عارف كويس"، مضيفاً، "هتسيب سيرة حلوة ازاي وانت مابتعرفش تلعب مفيش حد هيجيب سيرتك لا بالحلو ولا بالوحش".