كهربا: "أنا صعبان عليا نفسي وعمري ما قصرت في الأهلي"
الجمعة 07/يناير/2022 - 06:56 م
رفض محمود عبد المنعم "كهربا"، لاعب الفريق الكروي الأول بالنادي الأهلي، وصف تجربته في الأهلي بـ"الفاشلة"، قائلاً، "مخدتش فرصتي كاملة في الأهلي، ناس بتقول أنا منجحتش، بس الأرقام بتقول إن سجلت وصنعت في وقت قليل وحققت بطولات، أنا نجحت في الأهلي لو خدت فرصتي كاملة كان الوضع اتغير، الموضوع غصب عني ومفيش أي تقصير من ناحيتي لأني كنت بتمرن كويس بس دي وجهة نظر المدير الفني وتحترم".
وأضاف "كهربا" في تصريحات تلفزيونية، "موسيماني بيحب ويكره؟ مقدرش أتكلم على مدربي، وكفاية إشادة الكابتن الخطيب بيا، علاقتي بموسيماني كويسة جداً، عمري في حياتي ما اتكلمت مع صحفي واتعلمت في الأهلي إن أسرار أوضة اللبس متطلعش بره، لما اتكلمت مع موسيماني اقتنع وهو حقق في الموضوع".
وتابع، "أنا صعبان عليا نفسي، لأني مقصرتش، في الأول والآخر دي كورة وفي الأول والآخر راجع بيتي تاني الأهلي، مش عارف أعبر على حب جمهور الأهلي اللي اداهولي لو أطول أبوس على دماغ كل واحد من الجمهور على الحب ده، أنا معملتش حاجة ومساهمتش وملعبتش كتير وغصب عني ومش بإيدي".
