"عذبها ورماها قدام المستشفى".. تفاصيل مصرع سيدة على يد زوجها بالإسكندرية (صور)
الإثنين 17/يناير/2022 - 02:56 م
واقعة مروعة شهدتها محافظة الإسكندرية، بعدما أقدم زوج على الاعتداء على زوجته بالضرب حتى فارقت الحياة متأثرة بإصابتها ثم نقلها بسيارة صديقه وألقى جثتها أمام إحدى المستشفيات.
وقال رمضان والد سارة ضحية زوجها بالإسكندرية، عبر حسابه الشخصي بموقع التواصل الاجتماعي "فيس بوك": "نداء واستغاثة.. ذنب بنتي في رقبة كل مسؤول في مصر.. حق سارة لازم يرجع بالقانون جوزها عذبها ورماها ميتة عند مستشفى.. استغاثة بكل مسؤول في مصر.. حق بنتي لازم يرجع".
بينما قال أحد الأشخاص: "سارة ضحية زوج ماتت فيه الإنسانية والرحمة عاشت طول الوقت بتضرب وتتهان وكان بتصبر عشان بنتها.. كانت بتشتغل في التمريض وعشان توضيب شقتها عملت قرض وكان المفروض الزوج يشارك معاها لكن الزوج كان مدمن ومفيش منه فايده قررت تسافر لما جالها عقد عمل عشان تسد القرض اللي هو 150 الف جنيه وحاولت تسفر زوجها ليها لكن بسبب الكورونا مقدرتش تسفره".
وتابع: "فضلت سارة تشتغل وتسد في القرض لحد ما نزلت وبعد مانزلت بقي يشرب ويرجع يضربها والجيران تحوش زي ما اتعودوا لحد ما قررت تنفصل وبالفعل انفصلت لكن فضل يزن تاني عشان يرجعها وفضل يقول نربي بنتنا وانا بطلت وبالفعل رجعت عشان عايزه تعيش وتربي بنتها.. رجعت يوم الخميس اللي فات لكن كان ناوي لها على الغدر مجرد مارجعت يدوب كام يوم والتاني وراح شرب ورجع كالمعتاد ومسكها فضل يضرب فيها من بليل للصبح والجيران فضلت تخبط فتح لهم وقعد يزعق معاهم راح قايل خلاص مش هضربها تاني وأخد بنته ونزل وداها عند الجيران ودخل كمل عليها لحد ما حس إنها بتموت".
وأضاف: "راح متصل بواحد صاحبه جاله بعربيه ونزلها وراح يوديها المستشفي وهو في الطريق خلى صاحبه يكلم أهلها يقول أنها تعبانه وروحولها المستشفى وعلى ما وداها كانت خلصت سابها طبعا وهرب.. سارة دماغها مفتوحة ورجليها مكسورة وشريانها اتقطع وأنفها مقطوعه.. كان بيضربها بغباء ومكنش بيميز لما ماتت في ايده".
