"اللي كان معاكوا ده يبقا جوز الوزيرة".. تفاصيل صادمة يكشفها شاهد بـ "رشوة الصحة"
الإثنين 31/يناير/2022 - 04:26 م
قال الشاهد الثالث في القضية المعروفة إعلاميًا بـ"رشوة الصحة"، أمام المحكمة: "أنا أعرف المتهم الثالث من 5 سنين بس كان بقالنا فترة مبنتكلمش مع بعض.. كلمته في مرة عشان هو قالي إن ليه علاقات واسعة.. وقلتله أنا عاوزك لإن خالي ومجموعة من الشركاء عندهم مشكلة في المستشفى وتراخيصها وهو قالي أنا أعرف".
وتابع: "جه خالي اللي هو الشاهد الأول وروحنا كافيه بالتجمع الخامس.. وبعدها جه المتهم الأول والثالث، وقعدنا واتعشينا وفتحوا موضوع مشاكل تراخيص المستشفى.. المتهم الأول مكناش نعرف هو مين وقالنا: "اعتبروا الموضوع خلصان".. وبعدها حاسبنا المطعم ومشينا".
وأضاف: "المتهم الثالث طلع معانا وقالنا القعدة دي قعدة بيزنس.. ولما سألته يعني إيه قالي: يعني فيها دفع فلوس.. هما طالبين 10 مليون.. أنا استغربت من المبلغ لأني افتكرتها هدية 10 آلاف أو 20 ألف.. وبعدها المتهم الثالث قالنا اللي انتوا كنتوا قاعدين معاه ده يبقا زوج وزيرة الصحة".
وأكد: "مشينا واحنا مصدومين لإن متوقعناش يتطلب مننا فلوس فأنا حسيت إن فيه حاجة غلط وحاولت أخرج نفسي من الموضوع.. وخالي وباقي شركاءه بلغوا الرقابة الإدارية وعرفوني بعد ما بلغوا وقالولي إن الموضوع ده محدش يعرف عنه حاجة".
