"أنا بعشق تراب بلدي".. شريف إدريس يرد على محرفي تصريحاته بعد الاعتزال

علق الفنان المعتزل شريف إدريس، على تحريف تصريحاته أمس بعدما قرر اعتزال الفن، مؤكدا أنه لم يفكر في قتل أولاده ولكنها مجرد كوابيس، موجها رسالة لكل من حاول الاتصال به.

وكتب شريف عبر حسابه الرسمي بموقع التواصل الاجتماعي "فيس بوك"، "معلش يا جماعه أنا بعتذر للجميع عن عدم ردي عالتليفون وانا الحمد لله كويس وبخير..بس فيه كام حاجه مهمة جدا عايز اوضحها..الناس اللي بتقولي شيل البوست علشان ولادك ".

أضاف: "أنا مش محرج ولا مكسوف من اللي كتبته..واللي كتبته وحضراتكم مش قادرين تفهموه اني راجل بيحترم نفسه ومش قابل إهانه في شغلي اللي اتربيت فيه وولادي هيكبرو ويفهمو ده".

تابع: "أنا ماقولتش اني فكرت أقتل عيالي انا قولت ان الضغوط اللي انا فيها وصلتني اني بحلم بكوابيس اني بقتل عيالي..واظن كلكم بتحلمو بكوابيس…عيالي دول هما كل حاجه في حياتي لا يمكن أأذيهم ولا أفكر أأذيهم.. أنا ماقولتش اعتزلت علشان أتوب..أتوب عن إيه مش فاهم  انا شاركت من وانا عيل صغير في اعمال محترمه الكل بيحبها..وعمري ماشاركت في حاجه خليعة".

وأردف: "الناس اللي واحده البوست باستهزاء وتقليل وعدم احترام..دول مايتردش عليهم ..اللي يستهزء في كرب بني أدم يبقي شخص عديم الإنسانية".

وتابع: "أيوه أنا بدور علي فرص سفر كويسه مش علشان بكره البلد انا بعشق تراب البلد دي أكتر من أي حد.. ناس كتير بعتتلي ان قناة الجزيره مشيره البوست بتاعي..وصفحات الاخوان..ودي مش مسؤليتي وكل الناس عارفين موقفي الواضح تماما ضد الإخوان ..وكل الناس عارفين انهم بيصطادو في الميه العكره..والأهم ان انا كل كلامي واضح وصريح ومالوش اي علاقه بالسياسة  ولا اتهمت الدولة ولا قولت مؤامرة ولا قولت اي حاجه اصلا..دي ارزاق والارزاق علي الله وانا راضي بقضاء الله وقدره…الحمد لله".

واختتم حديثه: "الحمد لله اني اخدت قراري وانا واقف علي رجلي وبصحتي لأن فيه. زملاء وصلو لمراحل صحيه صعبه ربنا معاهم ويشفيهم…فانا مش هستني يجرالي حاجه وابقي راقد دعواتكم..انا الحمد لله كويس وبخير..وان شاء الله كله هيعدي..من كان رزقه علي الله فلا يحزن تحياتي للجميع وشكراً ليكم ولمحبتكم".