"يا إما جهلاء يا متطرفين".. أمير طعيمة يهاجم بعض صناع دراما رمضان

علق الشاعر الغنائى أمير طعيمة، على بعض صناع موسم الدراما الرمضانى الذين استعان بعضهم بأحدث وشخصيات دينية، مطالبا من الصناع الاستشهاد بالازهر الشريف والكنيسة في المسائل الدينية، بسبب ظهورهم بطريقة غير صحيحة.

وقال أمير عبر حساب رسمى فيس بوك " لما بتعمل فيلم عن حرب الاستنزاف او حرب أكتوبر فإنت ملزم بإنك تستعين بالمؤسسة العسكرية، لأن مهما كانت معلوماتك استحالة تكون على نفس قدر المعلومات اللي عندهم.

وأضاف " و لو بتعمل عمل عن المخابرات او القضاء أو الشرطة أو أي مهنة فإنت بتحتاج جلسات مطولة مع واحد و اتنين و تلاتة عشان انت مش هتبقى عارف زيهم، وده نفس الأمر بالنسبة للمسائل الدينية إنت ملزم دينيا و أخلاقيا بالرجوع للكنيسة لو أمر يخص المسيحيين و لمؤسسة الأزهر لو أمر يخص المسلمين، و مهما كانت ثفافتك و الكتب اللي قرأتها دي أكيد نقطة في بحر الكتب اللي قرأها علماء دي شغلتهم".

وأوضح " نقطة ان الكلمة الفلانية مش موجودة في القرآن ده تبسيط و سطحية مبالغ فيها، الكوكايين و الهيرويين و المخدرات عموما مش مذكورة لفظا في القرآن فهل معنى كده اننا نبني أحكام على عدم ذكرها صراحة، تفسير و تأويل الآيات و استنباط الاحكام منها و من السنة الصحيحة مش عمل فردي تقوم بيه بطولك بالبساطة دي، و لو مش خايف على دينك فإرجع برضه للأزهر عشان تعمل عمل مظبوط يفيد الناس".

وتابع " حاجة أخيرة تصوير الشيوخ طول الوقت على انهم يا اما جهلاء يا اما متطرفين و في افضل الأحوال انتهازيين ده أمر يجب أن يتوقف، و هتقولي فيه منهم كده هقولك صح، بس تصويرك الدائم ليهم بهذه الصورة بيحول الاستثناء الي تعميم و بيخلي أجيال تطلع عندها صورة ذهنية عن الشيخ انه حتما كائن ضال مضل و ده ما يرضيش ربنا.

واختتم "انت حر فيما تؤمن بيه و هتتحاسب عليه، بس لحظة ما هتصدر الأفكار دي لغيرك فإنت ملزم بإتخاذ أقصى درجات الدقة و التحري قبل ما تنشرها بين الناس".