والدة أحد الصيادين العائدين من اليمن:"كنت هموت لما عرفت اللي حصل لابني.. والرئيس السيسي رد روحي ليا" (فيديو)

وصل في الساعات الأولى من صباح اليوم الأحد، البحارة المصريين الـ 20 العائدين من اليمن، الذين تم تأمين الإفراج عنهم باليمن إلى أرض الوطن، بعدما جرى تأمين عودتهم إلى البلاد بتوجيهات رئاسية.

وأجرى "مصر تايمز" بثًا مباشرًا مع والدة أحد الصيادين العائدين الذين تم تحريرهم من اليمن، وبدأت والدة إسلام حديثها بالزغاريد تعبيرًا عن فرحتها بعودة إبنها، وقالت: " ابني الوحيد اللي ربنا رزقني بيه، ولد على 5 بنات، أنا كنت هموت في رمضان بسبب اللي حصل لإبني، قعد 4 أيام بعد ما سافر ماتصلش، وحسيت بحاجة في قلبي قلت أكيد إسلام حصله حاجة، ولما عرفت خبر غرق السفينة جريت فى الشارع وقلت ابني ما غرقش أكيد، وبقيت اعيط و أبص في السما ربنا وأقول يارب رجعلى ابني، وسيادة الرئيس ربنا يباركله يارب رد روحي ليا، بشكرك يا سيادة الريس وربنا يحفظك لينا ويباركلك في اولادك وفي صحتك".

وروى إسلام الكفراوي كواليس احتجازه قائلاً: " كنا قربنا نوصل اليمن بالمركب وفجأة الساعة 5  لقينا طائرات بتضرب نار فوقينا لحد الساعة 6، وقفنا المركب بسبب ضرب النار والطائرات نزلت علينا وخطفونا، حبسونا في فندق بعيد".

وأضاف إسلام إبن مركز المطرية بمحافظة الدقهلية: " في يوم كنت سقعان جدًا، ففتحت الشباك وقلت لواحد من الخاطفين أنا محتاج غطاء أنا بردان، قالي ادخل جوه واللي هيتكلم فيكم هضربه بالنار، ونقلني في غرفة تانية كنوع من العقاب، وبعد حوالي 15 يوم، الخاطفين نقلنا المحكمة ودخلنا السجن الاحتياطي وبعدها اتحكم علينا بـ 45 يوم سجن، وبعدها اتحكم علينا بالسجن لمدة 6 شهور وغرامة 26 ألف دولار و3 مليون ريال يمني، وطبعا احنا مش معانا المبالغ دي، انا حتى قلت للقاضي احنا لو اتبعنا مش هنجيب الـ 3 مليون دول، ده انتوا تموتونا أحسن".

وأكد والد إسلام أن صاحب المركب الذي شجع البحارة على الهجرة غير الشرعية إلى اليمن، لم يساعدهم ولم يحاول تخليص البحارة من أيدي الخاطفين: " مسألتش فينا ولا في ولادنا ولما كلمته وبقوله ولادنا إيه اللي حصلهم، قالي انت بتسأل عن ناس، ده انا خسران مركب بـ 9 مليون جنيه".

وعن توجيهات الرئيس عبدالفتاح السيسي بسرعة إنهاء أزمة البحارة وإعادتهم للوطن علق قائلاً: " ألف حمد وشكر ليك يا رب، احنا بنشكر الرئيس عبدالفتاح السيسي إنه خرجنا من أزمتنا دي ورجعنا لبلدنا بالسلامة".

وعن شائعة غرق البحارة قال والد إسلام: " احنا بقينا زي المجانين مش عارفين نعمل إيه وولادنا غرقانين، رمضان والعيد كانوا أصعب أيام عدت علينا، وماحسينا بالعيد غير لما عرفنا إن ولادنا بخير وسيادة الرئيس يرجعهم لحضننا، ربنا يباركلنا في سيادة الريس ويوفقه يارب".

والجدير بالذكر، أن البحارة المصريين الـ 20 الذين تم تأمين الإفراج عنه باليمن، وصلوا إلى أرض الوطن، بعدما جرى تأمين عودتهم إلى البلاد بتوجيهات رئاسية، وكانت التوجيهات الرئاسية للجهات المعنية ركزت على سرعة إنهاء أزمة البحارة المصريين باليمن وإعادتهم للوطن سالمين.

وفور عودتهم إلى البلاد توجه البحارة بالشكر إلى الرئيس عبد الفتاح السيسى، وأكدوا أنهم كانوا على ثقة كاملة بقدرة الدولة المصرية تحت قيادة الرئيس السيسى على إنهاء أزمتهم.