"ساعدوني أجيب حقي".. أحد ضحايا مستريح أسوان يروي تفاصيل استدراجه وسرقة أمواله

قام أحد ضحايا مستريح أسوان بنشر مقطع فيديو موقع التواصل الاجتماعي "فيسبوك"، يروى فيه تفاصيل استدراجه من قبل المستريح، مناشدًا أجهزة الحكومة بمساندته لاستعادة ممتلكاته وأمواله.

وقال أحد ضحايا مستريح أسوان، "حجاج البريش أخد مني البطاقة وشغلني مستريح وقالي يلا شغل الدي جي واحتفل، واشتغلت معاه من تاني يوم على طول، وكل يوم يقولي فلوسك جاية بكرة، وأخد كتيرة مني ومن كل اللي شغالين معاه".

وأضاف "وفجأة بعد 11 يوم من الشغل معاه لقيت مباحث المنيا بتقبض عليا، وبعد ما خرجت رجعت اشتغل تاني، لقيته بيقولي أول ما تخرج هتستلم فلوسك، قالي انا عايز 45 مليون عشان اجيبلك الفلوس، أخدت الـ45 مليون روحت بيهم على أساس إن انا هستلم 60 مليار، هو اسمه حجاج البريش وفي أمين شرطة في المباحث اسمه أحمد عزت، هما الاتنين أخدوا كل فلوسنا، وأخدوا بهايم مننا، اخد مني عجل قالي لإيهاب بيه، وعجل لأحمد بيه صابر في مركز إدفو، علشان الناس دي تبعنا وهتقف معانا، وكانوا بيكلموني من أرقام خاصة بيبقى مكتوب على شاشة التليفون (رقم غير معروف)".

وتابع، "فقولتله ياعم حجاج ده مكتوب رقم غير معروف، قالي هما الجماعة دول اللي هيسلموك الفلوس، فقولتله انت واثق يعني فيهم ومتأكد، فلوس الناس الغلابة كدة ممكن تروح، قالي لأ أنا واثق فيهم 100%، وفي الآخر نصبوا عليا وعلى ابلد كلها، وأنا قاعد في البلد ماهربتش، هروح فين يعني ما هي دي بلدي، سيدات عيلتنا بس اللي مشيوا علشان خايفين عليهم، لكن الرجالة قاعدين علشان إحنا اتنصب علينا ومالناش دخل في النصب اللي حصل، انا بقالي أكتر من أسبوع ماكلتش، الناس كلها عايزة فلوس مني".

واستكمل، "وأنا مش عارف أجيبلهم فلوس منين أنا مابقاش حيلتي حاجة، وقالي الأرض اللي عند المستشفى دي تبعنا وهنبنيلك عليها حيشان وهبعتلك 2 مليون علشان تشتغل على طول، قولتله ماشي هستنى منك تليفون، ومن ساعتها ماكلمنيش واختفى، أرجوكم أقفوا معايا علشان أجيب حقي منهم، حجاج ده من السباعية، وأنا مسجلهم كلهم تسجيلات وهنزلها على النت علشان تصدقوني، أقفوا معايا علشان حقي مايضيعش، أي حد عملت معاه خير يقف معايا ويساعدني أرجوكم علشان أروح أجيب حقي، وهو مكانه معروف عنده بيت وأرض في السباعية هو وأحمد عزت، قولتله يعني إيه قالي أنا اللي بعاين وببص وباخد الشغل بتاعك وبوصله للناس اللي هيتوسطولك علشان الفلوس، بناشد الحكومة وأهل البلد إنهم يساعدوني علشان أجيب حقي وحق الناس الغلابة اللي معايا، بيوتنا اتكسرت وبهايمنا اتاخدت، اقفوا معايا عشان نجيب فلوسنا".