شهود العيان على مقتل كاهن الإسكندرية: "أبونا كان بيطلع صدقة لشحات والقاتل جيه من وراه وطعنه في رقبته بالسكينة" (فيديو)

بدأت ، اليوم السبت، أولى جلسات محاكمة المتهم بقتل القمص أرسانيوس وديد رزق الله، كاهن كنيسة السيدة العذراء بمحرم بك، اليوم السبت، بقراءة ممثل النيابة العامة، لأمر الإحالة، حيث قرأ وكيل النائب العام الاتهام الوارد بأمر الإحالة، أمام هيئة المحكمة، فيما واجه رئيس المحكمة المتهم داخل قفص الاتهام، بما جاء فى أمر الإحالة من إتهام، فأنكر المتهم ما جاء بالاتهام، وأدخلت قوات الأمن، المتهم بقتل القمص أرسانيوس وديد رزق الله، كاهن كنيسة السيدة العذراء بمحرم بك، قفص الاتهام بقاعة محكمة جنايات الإسكندرية، وسط حراسة أمنية مشددة، استعدادًا لبدء سماع شهود الواقعة ودفاع المتهم.

وأجمع الشاهدان على مقتل القمص أرسانيوس، على نفس الأقوال قائلين: " أبونا أرسانيوس كان عايز يغير من أجواء الاجتماعات الروتينية، فقرر إننا نتجمع برة الكنيسة ونتفسح، وكنا حوالي 35 فرد إحنا وأبونا أرسانيوس، واتقسمنا على 3 ميكروباصات، وركبنا حوالي الساعة 4:30، ووصلنا الساعة 5:30 لحديقة عامة، واتكلمنا في جميع مناحي الحياة، وكان معانا حاجات حلوة وابتدينا نوزع على بعض بس أبونا قال استنوا لما آذان المغرب يأذن عشان اخواتنا المسلمين، وفعلا استنينا وأكلنا بعد ما الآذان أذن، خلصنا على الساعة 8 ومشينا على الكورنيش علشان الميكروباصات اللي جينا فيها كانت راكنة عند الكورنيش".

وتابعا: " وبعدين لقينا شحات بيطلب من أبونا صدقة، فأبونا لف علشان يطلع من جيبه فلوس، فلقينا فجأة واحد جاي من ورا أبونا وعدى من وسطينا وخبط في واحدة من البنات من سرعته واعتذرلها، وبعدين بطأ خطوته وقعد يبص حواليه فافتكرنا إنه هيضايق حد من البنات أو هيسرق شنطة، وكان في كيس في إيده ونط بسرعة وضرب أبونا بسكينة في رقبته، لقينا أبونا حط إيده على رقبته وإيده غرقانة دم، فأخدناه ركبناه الميكروباص وجرينا بيه على أقرب مستشفى".

وأضافا الشاهدان: " القاتل حاول يجري على الرصيف التاني بس الشباب لحقوه ومسكوه وكتفوه لحد ما الشرطة جات وقبضت عليه"، وتعرف الشاهدان على الجاني عندما طلب منهما المستشار وحيد صبرى، رئيس المحكمة، أن يقتربا من القفص ليقررا ما إذا كان هذا الجاني أم لا.

الجدير بالذكر، أن محكمة جنايات الإسكندرية، قررت اليوم السبت، تأجيل  محاكمة المتهم بقتل القمص أرسانيوس وديد، كاهن الإسكندرية، وذلك برئاسة المستشار وحيد صبري، رئيس المحكمة، وعضوية المستشارين: طارق محمد حافظ، ووائل حسن الشربيني، وسكرتير الجنايات فايز القطعاني إلى 18 مايو.