"بربطهم بالجنازير وأنا خارجة".. الحاجة شربات تروي معاناتها بسبب مرض أولادها: "حالتهم نادرة ونفسي في معاش" (فيديو)

أجرى "مصر تايمز" بثًا مباشرًا مع الحاجة "شربات" التي تبلغ من العمر 49 عامًا وتعول ثلاثة أبناء من ضمنهم إثنان من ذوي القدرات الخاصة، وخلال البث المباشر روت الحاجة "شربات" معاناتها مع أولادها قائلة: "أنا بشتغل في المعمار بطلع مع الرجالة على الونش وبشيل طوب وزلط وأسمنت وبطلعه، وأحيانًا بسرح في الغيط عشان أصرف على ولادي التلاتة منهم اتنين من ذوي القدرات الخاصة،  الكبير اسمه مصطفى عنده 24 سنة، وعنده إعاقة ذهنية وصرع، والتانية اسمها ضحى  عندها 21 سنة وعندها تأخر عقلي واضطراب نفسي وصرع".

وقالت الحاجة "شربات" إنها تجد صعوبة في التعامل مع أبناءها نظرًا لحالتهم المرضية: " التعامل معاهم صعب بطريقة غير عادية، المرض اللي عندهم غير وراثي، مفيش حد في عيلتنا عنده الأمراض دي، والحمدلله دي هدية ربنا إحنا راضيين بيها الحمدلله"، وأضافت: "أنا مابقيتش قادرة أشتغل زي الأول لإني عملت حادثة قبل كدة وأنا رايحة الشغل، العربية اتقلبت بيا وحصلي كسر في الحوض، وبقى عندي الغضروف في الفقرات العنقية، ومابقدرش أشيل تقيل بس برضايا أو غصب عني أنا لازم أشيل تقيل عشان لقمة عيشي، ولسة بشيل طوب وزلط بس والشغلانة مش دائمة على حسب الرزق مابييجي".

وعن سبب قيامها بتلجيم أبنائها بالقيود قالت: "لما بخرج للشغل بضطر أربط مصطفى بالجنازير، وبوصي الجيران ياخدوا بالهم من ضحى، لإن مرة مصطفى خرج من الدقهلية راح الزقازيق مشي في عز البرد وولاد الحلال كتر خيرهم رجعوهولي، فاضطريت اربطه خوفًا عليه، وانا الوحيدة اللي بعرف اتعامل معاه، ومرة كان ماشي جمب الترعة وحالة الصرع جاتله فوقع في الترعة وأهل البلد طلعوه ربنا يباركلهم، ومرة كنا في المستشفى كان هيرمي نفسه من الدور السابع لولا أنا قربت عليه وشديته، بس هو قعد يعضني ويضربني وأنا بستحمل وبحاول أهديه، وقعدت وقتها أصرخ وأعيط جامد جدًا، فصعبت عليه وبدأ يهدا، وساعات كمان بيمسكلي السكينة".

وناشدت وكيل وزارة التضامن الاجتماعي بمحافظة الدقهلية بمساعدتها قائلة: "بطلب من الأستاذ وكيل وزارة التضامن الاجتماعي معاش ليا أنا وزوجي، لغن زوجي عنده ضيق في التنفس وحساسية على صدره ومابيقدرش يشتغل، أنا كل اللي بطلبه حاجة بسيطة تقوينا على المعيشة، لإني مابقيتش قادرة أشتغل، والتعامل مع الولاد بقى صعب، أنا تعبت جدًا، رجليا مابقيتش بتشيلني، أنا طول عمري بشتغل ومابمدش إيدي لحد، ودلوقتي مابقيتش قادرة، أعمل إيه أستلف من الناس واخش السجن يعني؟"