واقعة مارينا صلاح تتكرر في الإسكندرية.. وفاة سيدة داخل المستشفى بسبب الإهمال الطبي .. وأسرتها تستغيث بالرئيس: عايزين حق بنتنا (فيديو)

أجرى "مصر تايمز" بثًا مباشرًا مع أسرة ضحية الإهمال الطبي وتدعى "نيفين محمد"، وروت أسرة الضحية تفاصيل الواقعة: " قبل ما تروح المستشفى كانت طبيعية جدًا ومابتشتكيش من أي حاجة غير مغص وترجيع، وكشفت عن دكتور باطنة داخل المستشفى، وشك إنها عندها المرارة، عملت آشعة وطلع عندها حصوة في المرارة، والدكتور قالها إنها لازم تستأصل المرارة، وحولها على دكتور جراح داخل المستشفى، والدكتور الجراح كان كل همه الاتفاق على تكلفة العملية، والدليل على كدة إن مفيش أي متابعة أو فحوصات اتعملت قبل ما تدخل غرفة العمليات وماشافوش تحاليلها، الحاجة الوحيدة اللي عملوها إن الممرضة قاست الضغط والسكر، ولقت إن السكر مضبوط، بس الضغط كان واطي 100/60".

وتابعت ابنة خالة الضحية قائلة: "اعترضنا وقولنا إزاي هتدخل غرفة العمليات وضغطها واطي، وطلبت إن طبيب يشوفها، قالولنا لأ عادي ده ممكن يكون الطبيعي بتاعها، وأصروا إنها تدخل غرفة العمليات، وقالوا دي عملية بسيطة أسهل من خلع الضرس، ودخلت تعمل المرارة خرجتلنا ميتة، والدليل على إنها كانت سليمة قبل دخولها العمليات إنهم في المستشفى ماطلبوش منها تمضي على إقرار قبل دخول العملية، وأنا بحمل المستشفى مسؤولية اللي حصل لبنت خالتي، وبعد ما دخلت العمليات بربع ساعة، واحدة من التمريض قالتلنا الدكاترة عايزين تحاليلها جوة".

وأردفت: " المفروض إنها عملية بسيطة مابتاخدش تلت ساعة، والدكتور كان مغرور جدًا ومستهتر بالعملية علشان عملية بسيطة، لما دخلنا المستشفى نيفين ماكانش معاها بطاقتها والمستشفى مأجلتش العملية وقالوا مش مشكلة هاتوا بطاقة أي حد، مش فارق معاهم حاجة غير الفلوس".

وعن شعورهم بعدما علموا بوفاتها، قالت ابنة خالتها متأثرة: "اتصدمنا صدمة كبيرة لإننا كنا متوترين جدًا عشان العملية أخدت أكتر من 6 ساعات والمفروض إنها مابتاخدش أكتر من نص ساعة، وهي أصلاً كانت سليمة ومحضرة هدومها اللي هتلبسها والأكل اللي هتاكله بعد العملية، وفجأة لقينا التمريض بيتوشوش وفي حركة مريبة، وبعدها قالولنا إنها ماتت، أخدوها من إبنها اللي عنده 6 سنين، وأخدوها مننا".