ضحايا المستريح الجديد بالإسكندرية:"ورقه كله كان سليم وماتوقعناش إنه هيغدر بينا" (فيديو)

أجرى "مصر تايمز" بثًا مباشرًا مع أحد ضحايا مستريح الإسكندرية، ويدعى رؤوف عبد ربه محمد حسن، الشهير بـ "رؤوف دولار"، وروى الضحية تفاصيل الواقعة قائلاً: " لقينا شركة للاستثمار الإلكتروني عبر الإنترنت، عاملة حملة دعائية كبيرة على الصحف الورقية وعلى مواقع التواصل الاجتماعي "فيسبوك" و "إنستجرام" و "تويتر"، الشركة دي إسمها (انفست- إي تريدنج) لصاحبها رؤوف عبد ربه محمد حسن، وشريكه عمرو صديق، في الأول كنا حابين نتأكد إن في شركة فعلاً وإنهم مش نصابين، اتصلنا برقم التليفون بتاعهم وكانت بترد علينا السكرتيرة مي حسن، وكانوا بيقولولنا عايز تتأكد تعالى شوف كل أوراقنا رسمية ومختومة، وعلشان يثبتلما حسن نيته أكتر كان بيورينا تعاملات ليه مع شيوخ بالأزهر وشخصيات مهمة، وشهادات حاصل عليها من جامعات أوروبية وأمريكية وشهادات في مجال التجارة الإلكترونية، والله اعلم بقى الشهادات دي حقيقية ولا مزورة، وكمان معاه جواز سفر أمريكي، واكتشفنا إنه مزور".

وتابع ياسر عبدالمنعم، أحد ضحايا المستريح: "كل أوراقه كانت سليمة، اطلعنا على مستخرج من السجل التجاري للشركة، وشهادة تأسيس للشركة مختومة بختم النسر، وشهادة بمزاولة النشاط من غرفة صناعة تكنولوجيا المعلومات والاتصالات، وشهادة من مصلحة الضرائب تفيد بأن الشركة بتمارس التجارة الإلكترونية عبر الإنترنت، كل ده طمنا وإتأكدنا إنه مش نصاب، خصوصًا إنه ورانا إنه بيتعامل مع بنوك أجنبية وعميل مميز فيها كمان".

وناشد المسؤولين بمساندته هو وباقي الضحايا: "بناشد الجهات الأمنية والمسؤولين أنهم يكون ليهم ضربة قاضية لكل من تسول له نفسه لمهاجمة اقتصاد الدولة وتدمير المواطنين، إحنا دخلنا معاه الشركة بحسن نية وماتوقعناش إنه ممكن يخوننا وينصب علينا، أرجو إن الناس ماتهاجمناش وتقف جمبنا، إحنا آه اخطأنا إننا آمننا لواحد زيه، بس إحنا مش طماعين، نرجوكم إنكوا تكونوا ظهر ومصدر قوة لينا، وأملنا في ربنا كبير إنه هيردلنا حقنا".