"اتحرمت من بنتي وعايزة حقها".. والدة حنين ضحية حادث فرح بورسعيد تروي تفاصيل وفاتها (فيديو)
السبت 21/مايو/2022 - 05:10 م
كانت الطفلة "حنين" إبنة محافظة بورسعيد البالغة من العمر 11 عامًا، تشاهد حفل زفاف من شرفة منزلها، وكان يطلق الحضور أعيرة خرطوش نارية احتفالاً بحفل الزفاف، وأصابت إحدى الأعيرة الطفلة "حنين"، مما أدى لنقلها إلى إحدى مستشفيات بورسعيد، ثم وافتها المنية بعد بضع أيام متأثرة بإصابتها.
وروت مروة السيد، والدة الطفلة "حنين" تفاصيل الحادث لكاميرا "مصر تايمز" وهي تبكي قائلة: " لما سمعت صوت الزفة جريت على البلكونة تتفرج زيها زي أي طفلة، بمجرد ما خرجت للبلكونة اتصابت بخرطوش في وشها والجمجمة والجيوب النفية والعين والعمود الفقري، سمعتها بتصرخ دخلت البلكونة لقيت في بحر دم وبنتي واقعة على الأرض".
وطالبت المسؤولين بتغليظ العقوبة على مستخدمي الخرطوش: "أنا كل اللي بطلب بيه تغليظ العقوبة على اللي بيستخدموا الخرطوش، حنين مش أول واحدة يحصل فيها كدة، وعايزة الكاميرات تتفرغ عشان أعرف مين اللي عمل كدة في بنتي"، وأضافت وهي باكية: " أنا إيه ذنبي اتحرم من بنتي علشان ناس تفرح، أنا عارفة إن ده قضاء الله وقدره بس انا قلبي واجعني".
