"زواج بدون ديون".. مبادرة عملها شباب الفيوم الجدعان عشان يساعدوا أهل بلدهم (فيديو)

أطلق مجموعة شباب من قرية سمهور بمحافظة الفيوم، مبادرة تسمى "زواج بدون ديون"، وذلك لتخفيف أعباء تكاليف الزواج عن كاهل أسرة العريس والعروسة.

وروى أحد مؤسسي "زواج بدون ديون" لكاميرا "مصر تايمز" خلال البث المباشر تفاصيل المبادرة: "من 15 يوم كنا بنفكر أنا ومجموعة من أصدقائي في فكرة غلاء المهور، دلوقتي علشان حد يتزوج بيدخل في دوامة لا نهائية من الديون، قعدنا نفكر في حاجة تساعد الشباب والبنات وهي مبادرة سميناها (زواج بدون ديون)، ومعناه إن الناس تتزوج وتجيب الأساسيات بعيدًا عن الكماليات اللي بتستنزف طاقة الأسرتين واللي بتتسبب في الديون".

وضرب أحد مؤسسي المبادرة مجموعة من الأمثلة التي ترهق أسرة العروسين ماديًا من دون داعي، والتي تدعو المبادرة بإلغاءها قائلاً: " لازم أهل العروسة يجيبوا حاجة أنا بسميها رشوة مقننة، وهي جهاز كهربائي لوالدة العريس كهدية، وأهل العروسة ماديًا مش قادرين يجهزوا بنتهم لما هيجيبوا هدية كمان لوالدة العريس، وكمان حاجة اسمها (رد الشبكة)، وهي إن العروسة تجيب عجل أو خرفان للعريس مقابل الشبكة، وفي حاجة كمان اسمها (غدا القاضي) العريس بيدفع لأبو العروسة من 30 لـ 50 ألف جنيه عشان يعمل عشا، الشاب البسيط يجيب كل ده منين؟، فإحنا بندعو من خلال مبادرتنا بإلغاء الكماليات المرهقة دي".

وعن هدف المبادرة قال: "بدأنا كشباب نكلم بعض في القرى المجاورة ونشوف هنعمل ايه، وقررنا اننا ننشر مبادرتنا دي على السوشيال ميديا علشان نوصل لأكبر عدد من الشباب، وقررنا إن المبادرة تغزو قرى مصر كلها مش الفيوم بس، وهدفنا هو تخفيف العبء على الشباب والبنات، وتخفيض متطلبات الزواج"، وناشد الآباء والأمهات: " بقول للآباء وللأمهات اتقوا الله في شبابكم اتقوا الله في بناتكم إن الأمر لا يتحمل أكثر من ذلك".