بأنامل ذهبية.. سيدات الصعيد يعزفون على أوتار نول الفركة لإحياء مهنة الفراعنة: السياح كلها بتيجي تشتري مننا (فيديو)

تعزف سيدات وفتيات مركز نقادة بمحافظة قنا، على أوتار نول "الفركة" بأناملهن الذهبية، لينتجوا أجود أنواع المشغولات اليدوية التي تجذب الجمهور داخل وخارج مصر، وأجرى "مصر تايمز" بثًا مباشرًا من داخل مشغل لـ "نول الفركة" بقرية "كوم الضبع" بمحافظة قنا.

وقالت جهاد حامد، مسؤول الإنتاج بالمشغل لـ "مصر تايمز" خلال البث المباشر: " دربنا في الأول 18 بنت طلع منهم 9 بيشتغلوا معانا وبينتجوا، وإحنا بادئين من سنة واحدة، لكن المكان موجود من 2009 بس ماكانش شغال بنفس قوة دلوقتي"، وعن تسويق المشغولات اليدوية قالت: " تسويقنا كله في المعارض المنتظمة زي معارض وزارة التضامن الاجتماعي، وشغلنا ساهم كتير في تنشيط السياحة".

وعن السيدات والفتيات العاملات بالمشغل قالت: " الفركة ساعدت سيدات كتير إنهم يفتحوا مشاريعهم الخاصة، وعلشان نبدأ نستقطب السيدات والفتيات للمشروع أعلننا عن التدريب الحرفي للفركة، واتقدم لنا مجموعة كبيرة من البنات والسيدات، وعملنا مقابلات وتم اختيار مجموعة منهم وتم تدريبهم لمدة شهر واختارنا أفضل 9 منهم".

وأفادت جهاد حامد أن الفتيات والسيدات يعملن على أحدث إصدارات النول: " إحنا عندنا النول المتحرك الخشبي، وده أحدث جهاز للنول، كان زمان اللي بيشتغل على النول بيحفر حفرة وبينزل فيها ويشتغل على النول، وبعد كدة اتطور وبقى بناية ، وآخر تطور ليه النول المتحرك الخشبي، وده سهل تفكيكه ونقله في أي مكان".