"كان بيعمل خير فا ولعوا فيه وهو حي".. وفاة مواطن بكفر الشيخ بطريقة مأساوية

روى أحد أطفال الضحية "أحمد محمد المغازي" تفاصيل الواقعة لكاميرا "مصر تايمز"قائلا، " كنا راجعين من الغيط أنا وأبويا، ودخلنا البيت، وأمي كانت بتحضرلنا العشا، وفجأة سمعنا صوت زعيق، أبويا خرج لقى جيراننا بيتخانقوا، فواحد منهم قال لأبويا إلحق ولادي خدهم روحهم أنا مش قادر عليهم، بعدها أنا نزلت أقول لأبويا ييجي علشان العشا، لقيت في ناس جيراننا جايين بنبوت وأزايز وطوب وبنزين، واللي ماسك في ايده البنزين رشه على أبويا كله كان حوالي لتر بنزين لقيتهم اترشوا على أبويا وبعدين ولع في أبويا وجري".

وتابع باكيًا: " أنا أبويا وحشني جدًا، أنا شوفت أبويا وهو بيولع قصاد عيني، ومحدش طفاه هو حاول يطفي نفسه بس كان جلده كله اتحرق، ولما روحتله المستشفى قعد يقولي ماتخافش عشان انا شوفته وهو بيولع قصاد عيني". 

وقال أحد أبناء الضحية بالتبني، وهو باكيًا: " أنا كنت معاه في كل خطوة في حياته،  كان في زرعة زارعها مش عايزها تطلع من الأرض علشان لما بشوفها بفتكره وبحس كإنه واقف قصادي، كنا بنتمشى مع بعض ونعمل كل حاجة مع بعض، كان بيعاملني كإني إبنه وأكتر، وكان مجهزلي شقتي كمان عشان اتجوز".

وأضاف: " أنا هردله الجميل وهعمل مع ولاده زي ما عمل معايا، ولو احتاجوا حاجة وانا مش معايا فلوس انا ممكن ابيع نفسي علشان خاطرهم، زي ما هو عمره ما فرط فيا أنا عمري ما هفرط في ولاده"، متابعاً: " كان خارج من بيته بالتوكتوك، دخل البيت بعربية إسعاف، أنا بوست رجليه وهو في الكفن وقولتله أنت الحيطة اللي كنت مسنود عليها، ولا يوم من أيامك هيرجعولي تاني".