اللعب مع النار.. عم "غريب" أقدم حداد بقنا.. شغال على أدوات من 100 سنة و ايده تتلف في حرير
بالنار والمطرقة، يقف الحاج "غريب"، أقدم حداد في قنا، ليصنع بعض الأدوات الحديدية، باستخدام أدواته البسيطة التي يرثها من أجداده منذ 100 عام، فتتميز الصناعات الحرفية القديمة عن غيرها من الصناعات، حتى بعد تطورها، فتظل الصناعات القديمة لها بريقها الخاص، الذي يذكرنا بالتراث، ويبهر من يراها، ويمتلك "غريب" 60 عامًا، مجموعة من الأدوات البسيطة الخاصة بمهنة الحدادة والتي ورثها من أجداده منذ 100 عام، وأجرى "مصر تايمز" بثًا مباشرًا مع "غريب" ليروي سر تمسكه بالأدوات القديمة، على الرغم من تطور أدوات مهنة الحدادة عبر السنين.
الحاج "غريب" أقدم حداد في قنا
وقال "غريب" إبن محافظة قنا خلال البث المباشر: " أنا شغال في المهنة دي بقالي 50 سنة، يعني لما كان عندي 10 سنين، زمان كانت المهنة يدوية كلها مفيهاش أي آلات بنستعين بيها، دلوقتي بقالي حوالي 20 سنة بستخدم موتور الكهرباء علشان يساعدني شوية".
وأشار أقدم حداد إبن محافظة قنا أن مهنة الحدادة مهنة شاقة، خاصة مع استخدام تلك الأدوات البدائية البسيطة: " المهنة دي صعبة اوي وشاقة جدا ودخلها بسيط، وأنا ماليش أي دخل تاني غيرها، لو ماشتغلتش في يوم مش هلاقي ولا اكل ولا شرب، وأنا بصرف على 10 أفراد".
وأضاف أن أبناءه يرفضون العمل معه في نفس المهنة: " بقول لولادي تعالوا اشتغلوا معايا وساعدوني، بيقولولي يا راجل هي دي شغلانة نشتغلها مش عايزين نشتغل معاك"، وطالب الحاج "غريب" أقدم حداد في قنا خلال البث المباشر بحصوله على معاش نظرًا لكبر سنه وأنه لم يعد يتحمل العمل مثل السابق: " أنا كل الي نفسي فيه معاش يساعدني لإني مابقدرش على تكاليف يومي، ولو في يوم ماشتغلتش مش هعرف أصرف على أسرتي".
