شهود عيان يكشفون تفاصيل مقتل شاب على يد جيرانه بسبب قطعة أرض بالشرقية

شهدت قرية "منزل حيان" التابعة لمركز ههيا بمحافظة الشرقية، جريمة قتل بشعة جراء خلاف بين أسرتين راح ضحيتها الشاب " محمد ماهر نجاتي" الذي يبلغ من العمر 23 عامًا، طعنًا بالسكين، حيث كان "محمد" ذاهب برفقة والده ووالدته وجدته إلى أرضهم الزراعية لحصاد محاصيلهم الزراعية، ثم تُفاجأ الأسرة بقدوم جيرانهم، وأنهالوا عليهم بالضرب في أماكن متفرقة من أجسادهم للسيطرة على قطعة الأرض الزراعية التي يمتلكونها، وأجرى "مصر تايمز" بثًا مباشرًا مع مجموعة من شهود العيان ليرووا تفاصيل الواقعة. 

شهود العيان يؤكدون تبييت الجناة نية القتل

وأجمع شهود العيان على أن الشاب على خلق، وأن جيرانهم كانوا يبيتون النية لقتل الشاب: "هما كانوا مبيتين النية لمحمد، استغلوا ان الجو حر ومفيش حد برة بيته، لإنهم كان معاهم شوم وأسلحة بيضاء، وضربوا ابوه ومحمد جري مسافة كيلو عشان يهرب، بس هما مارحموش محمد واستغلوا ضعفه وجريوا وراه بموتوسيكلاتهم، و3 كتفوه وقالوا لابنهم يموته وفعلا ضربه بالسكينة في جمبه، واحنا أخدناه وشيلناه وطلعناه برة الأرض الزراعية، لإن الأرض الزراعية كانت مليانة دم محمد، لإنه كان بيحاول يكتم دمه اللي بينزف من جمبه وضهره بالطينة، ولما قولناله ساعدنا وقوم معانا علشان نطلعك قالنا مش قادر ضربوني وكسرولي ايديا ورجليا".

والد المجني عليه لم يكن يعلم أن ولده تم قتله

وتابع: " لو مشاجرة زي ما الناس بتقول ماكانوش جريوا وراه وتتبعوه بموتوسيكلاتهم وكتفوه وقتلوه، دول ناس ناويين إنهم يقتلوه من غير رحمة، ابوه جيه بيشوف مين واقع على الأرض وشايلينه سألني مين اللي واقع على الأرض ده قولتله ده ابنك، حضنه وقعد يعيط ويصرخ من الصدمة، ومحمد قاله أنا بموت يابا، قاله يابني انت مش هتموت، ونطق الشهادة والإسعاف جات وأخدته".

شهود العيان يطالبون بالقصاص العادل

وطالبوا بالقصاص العادل من مرتكبي الجريمة: "احنا واثقين في القضاء المصري وبنطالب بالقصاص العادل، حرام اللي حصل في الولد وهو على خلق كبير".