"كانت بتستعد لفرحها".. والدة نورهان: بنتي اتخطفت من أسبوع وقلبي محروق عليها (فيديو)

انفصل والد ووالدة "نورهان" البالغة من العمر 18 عامًا، بمحافظة القليوبية، وأصبحت تتنقل "نورهان" إلى منزل والدها تارة، وإلى منزل والدتها تارة أخرى، ثم قررت "نورهان" الهرب لسبب غير معلوم حتى الآن، ولم يتبين ما إذا كان تم اختطافها، أم هربت بالفعل بكامل إرادتها، وأجرى "مصر تايمز" بثًا مباشرًا مع والدة "نورهان" لتروي تفاصيل الساعات الأخيرة قبل اختفائها.

تفاصيل الواقعة

وقالت والدة "نورهان" المتغيبة عن منزلها منذ أسبوع لكاميرا "مصر تايمز": "أنا منفصلة عن باباها ومتجوزة، والدتي كلمتني يوم التلات اللي فات الساعة 7 الصبح وقالتلي إحنا مش لاقيين نورهان، لإن حضانة بنتي مع والدتي، وبنتي بتزورني كل فترة، وبعد ما أمي كلمتني جريت بسرعة على بيت والدتي، وجربنا نكلمها على تليفونها كتير جدا من أرقامنا ومن أرقام غريبة وماردتش علينا".

وعن سؤالها إذا كان هناك خلافات عائلية أدت إلى  هروبها من المنزل قالت: "ماكانش في مشاكل خالص ولا أي حاجة مزعلاها الفترة الأخيرة، الحاجة الوحيدة اللي كان عليها خلافات وحليناها هو المكان اللي هتلبس فيه الشبكة، والدها كان عايز يعمل الحفلة عنده، وأنا كنت عايزة أعمل الحفلة عندي، وهي كانت حابة تعمل الحفلة عند والدها، وبعدين قولنا خلاص نعملها في قاعة في البلد عندنا علشان محدش يزعل".

وأضافت باكية: " أنا قولتلها عايزاني أبقى ضيفة هبقى ضيفة معاكي، ولو عايزاني أبقى أم هبقى أم معاكي، اللي انتي عايزاه هعمله المهم تبقي راضية، ووالدتي قالتلي انتي اللي هتعمليلها المكياج؟ قولتلها لأ خليها تروح لكوافير زي البنات وتبقى أحلى عروسة في الدنيا".

وعن شهادة الجيران عن اللحظات الأخيرة التي تم فيها رؤيتها قبل اختفائها قالت والدة "نورهان": "في ناس قالوا انهم شافوا نورهان ماشية مع واحدة شايلة طفل صغير ونورهان شايلة شنطة، في الأول ماكنتش أعرف هي مين، بس بعد كدة روحت البيت اكتشفت إن بنت جوزي مش موجودة في البيت، لإن بنت جوزي عايشة معانا في البيت، وهي هربت من جوزها قبل كدة علشان كان في بينهم مشاكل، وكانت بتقول أنا كل ما أروح لبابا بيرجعني لجوزي وأنا مش عايزة أعيش معاه، فهربت وراحت خدمت سيدة قعيدة وعاشت معاها، وقالت انا هتطلق، ورفعت قضية على جوزها واتطلقت، وهي علاقتها ببنتي كويسة جدا وكانوا بيحبوا بعض وصحاب جدا، لدرجة إن بنتي كانت بتزورني عشان تيجي تشوف بنت جوزي، وبدأوا يقربوا من بعض من 3 شهور، وكانت بتيجي وتبات عشان تقعد مع بنت جوزي، واكتشفنا بعد كدة إنها آخر مرة الجيران يشوفوها كانت ماشية مع بنت جوزي والناس قالوا انهم كانوا بيضحكوا وكويسين جدا، وقالولنا احنا ماحسينهاش انهم بيهربوا احنا قولنا اتنين قرايب وماشيين مع بعض".

واستغاثت السيدة وهي باكية قائلة: "من يوم ما مشيتي يا نورهان وأنا لا باكل ولا بشرب، والنبي اي حد يشوفها في الشارع يوصلني ليها".