"كان بياكل وغدروا بيه".. أسرة شهيد لقمة العيش بالطالبية تروى تفاصيل الواقعة

واقعة مفجعة شهدتها منطقة الطالبية، التابعة لمحافظة الجيزة، بعدما اقدم عدد من الأشخاص خارجين عن القانون بقتل "ناصر" وإصابة 4 أشخاص من أسرته بعد أن قاموا بالتعدي عليهم وتهديدهم بالأسلحة البيضاء والنارية؛ لوجود خلافات جيرة بينهما.

وقال زينهم أحد أقارب المجني عليه وضمن المصابين لـ"مصر تايمز" : " طول عمر ناصر جدع مع الناس كلها وسمعته طيبة..وبيوم الواقعة كنا قاعدين أنا وناس صحابي أنا والمجني عليه "ناصر" بنتكلم عن الخلافات اللي بينا وبين الناس اللي غدروا بيه وهنحل الموضوع أزاى وفاجأة لقينا صويت برا خرجنا لقينا ناس بيضربوا في المجني عليه ".

وتابع: "خرجنا لقيناهم بيقطعوا في جسم ناصر بالسكينة عشان كان بيرش مايه وعشان قالهم بطلوا بلطجة على الناس عيب كدا".

وأضاف: "أنا لما شوفت المنظر دخلت جبت شومة عشان أدافع عنه ضربوني بالخرطوش في بوقي ..أى اللي احنا عملناه عشان يحصل فينا كدا والراجل جدع معاه طول عمره سيد المجري دا".

واستكمل: "المتهم واخد كل حاجة في حياته بلطجة حتي الشقة اللي قاعد فيها قاعد فيها بلطجة كل يوم تقريبا لي محضر تعدي على حد ".

واختتم: "المتهم جاي وجايب بلطجية وداخل علينا بااسلحة بيضاء ونارية وكل دا عشان بنقوله ان هو وعياله مؤذيين وبلطجية وبنقولهم عيب عمايلكو دي عملوا فينا كدا.. أحنا بناشد المسؤلين وعايزين حقنا وحق الراجل اللى مات غدر".

ونجح رجال المباحث بمديرية أمن الجيزة، في إلقاء القبض على عاطل قتل جاره في منطقة الطالبية، بسبب خلافات سابقة بينهما، وتم نقل الجثة إلى المشرحة، وحرر محضر بالواقعة.

وتلقت غرفة عمليات النجدة، بلاغا من الأهالي بوقوع مشاجرة ومتوفى بشارع الجامع بمنطقة الطالبية، وعلى الفور انتقل رجال المباحث إلى المكان، وتبين مصرع "ناصر م" بعد إصابته بطعنه نافذة وتوفى في الحال بعد تعدى عاطل عليه بسلاح أبيض.

وكشفت التحريات، وقوع مشاجرة بين المجني عليه وعاطل يدعي "مؤمن أ" بسبب خلافات سابقة بينهما تعدي خلالها المتهم علي المجني عليه بسلاح أبيض محدثا إصابته التي أودت بحياته ولاذ بالفرار.

عقب تقنين الإجراءات تم ضبط المتهم، وتم اتخاذ الإجراءات القانونية اللازمة تجاه المتهم، وإحالته للنيابة العامة التى أصدرت قرار بحبسه 4 أيام على ذمة التحقيقات، وأمرت بتشريح جثة المجنى عليه، وطلبت تقرير الصفة التشريحية حول الواقعة.