دخلت عشان تولد بعد اشتياق 8 سنوات خرجت جثة.. وأهل الفتاة: "كان نفسها تبقى أم" (فيديو)

تمنت "هبة عصام" إبنة محافظة كفر الشيخ، صاحبة الـ 38 عامًا، أن تكون أم منذ 8 سنوات، وحقق الله لها أمنيتها ورزقها بمولودها المنتظر بعد 8 سنوات، ولكن خرجت "هبة" من غرفة العمليات جثة هامدة بسبب مسلسل الإهمال الطبي، وأجرى "مصر تايمز" بثًا مباشرًا مع شقيقة المجني عليها لتروي تفاصيل الواقعة.

اهمال طبي جديد بكفر الشيخ.. دخلت علشان تولد بعد انتظار 8 سنوات خرجت جـ.ـثـ.ـة هامدة.. وأهالي الفتاة يصرخون: "كان نفسها تبقى ام وعايزين حق بنتنا"

وقالت شقيقة "هبة" ضحية الإهمال الطبي إن شقيقتها مكثت في غرفة العمليات قرابة الـ 3 ساعات، وأن الأطباء كانوا يخبرونهم أن شقيقتها بخير، وهي لم تكن كذلك: "الدكتور طلب من أختي تحاليل وعملتها وحددلها معاد الولادة القيصرية، ولما دخلت تولد قعدت جوة حوالي 3 ساعات، وبعدت ما عدت أول ساعة فقلقنا، ولقينا دكتور التخدير خارج بيجري ودخل تاني، فسألت الممرضات هو في ايه؟ قالولي مفيش حاجة ده احنا نسينا حاجة والدكتور زعلان مننا اتطمني."

وتابعت: " ولما فات ساعتين ونص بدأت ازعق وأقولهم إيه اللي حصل لأختي فدخلوني غرفة العمليات لقيتها بطنها منفوخة وعندها صعوبة في التنفس، فقولتلهم لو أختي محتاجة عناية مركزة قولولي، فالدكتور قالي هو انتي هتخافي عليها أكتر مني؟ وخرجوني وأختي فضلت في غرفة العمليات تاني."

وقالت شقيقة ضحية الإهمال الطبي إن الأطباء أخبروهم إنهم لا يعلمون سبب تدهور حالة شقيقتها: "اترجيت الدكتور وقولتله لو اختي محتاجة عناية مركزة قولي فالدكتور قالي هي هتبقى كويسة دلوقتي واحنا مش عارفين اللي حصلها ده ايه سببه."