مصر للطيران تستبعد طالب هندسة خريج دار أيتام لعدم استيفاء بيانات الأب والأم
قال جو علي، أحد رواد موقع التواصل الأجتماعي "فيس بوك "أنه لم يتوقع في يوم أقول كده بس انا بجد تعبت من السخافة وتعبت من كتر معمال اعدي في مواقف بايخة وسخيفة بسبب حاجة انا مخترتهاش.
مصر للطيران تستبعد طالب هندسة خريج دار أيتام لعدم استيفاء بيانات الأب والأم
وتابع "جو " الي ميعرفنيش كويس انا من يوم مفتحت عيني على الدنيا و انا موجود في بيت لرعاية الأيتام وطبعا مش محتاج اتكلم عن كم التفرقة والعنصرية ونظرات التقليل الي الواحد بيتعرضلها من وهو صغير والحمد لله اجتهدت كتييير جدا في حياتي و طلع عيني و ربنا وفقني و اخدت منحة لدراسة الهندسة الميكانيكية في الجامعة الامريكية ال AUC وكأي طالب في هندسة بننزل في الصيف ندور على تدريب عملي علشان ننمي مهارتنا و نتعرف على سوق العمل و كمان علشان مينفعش نتخرج من غير عدد ساعات تدريب عملي معين.
وأضاف" جو" قدمت علي تدريب صيانة تابع لمصر للطيران و حقيقي كنت متحمس جدا اني هشوف ورش ضخمة ومعدات كتيرة وهسمع من مهندسين بقالهم كتير في المجال وأخد من خبرتهم.
وأكد" جو علي "المهم النهاردة كنت رايح انا و مجموعة من زمايلي في الجامعة نحضر اول يوم تدريب في فضلوا ينادوا علي اسامي الناس الي هتحضر التدريب العملي بتاع الصيانة و دوناً عن كل زمايلي الي معايا في الجامعة اسمي متنداش فطلعت علشان اشوف المشكلة في ايه لاقيتهم بيقولولي انهم نقلوني تدريب تاني اسمه التمثيلي او ال simulator وطبعا ده مش في الورش و الهناجر بتاعة المطار ده بيبقي في فصل عادي مفهوش حاجة عملي طب نقلتوني ليه؟ علشان انا مجاليش موافقة امنية علشان اخش الورشة طب ليه؟ علشان في استمارة الموافقة الأمنية بيطلبوا بيانات الاب و الام و طبعا دي خانة فاضية عندي مفهاش غير اساميهم الي الدولة حطتها في شهادة الميلاد. معرفش مهنتهم ولا رقمهم القومي لانهم ببساطة مش موجودين اصلا و محدش يعرف عنهم حاجة وقولتلهم طيب هم مش موجودين اعمل ايه؟ حاولت افهمهم اني من دار و أن مفيش بيانات متوفرة علشان اكتبها في الخانة غير الأسم بس قالولي مش هينفع لازم تملاها كلها.
وتابع: حاولت اعرض اني اجيب جواب من البيت بيثبت اني من ابناء مصر الأيتام ومقيم في دار رعاية من وأنا صغير اخدوا الحوار لاتجاه الي هو ماله ياحبيبي ال simulator ده انت هتتبسط اوي جوا و هتستفاد انا بجد حسيت بظلم كبير اوي النهاردة انا من حقي انزل تدريب عملي في الحاجة الي انا حاببها.
وأضاف "جو"من حقي انزل تدريب عملي زيي زي الناس الي كانت موجودة هناك و من حقي انزل تدريب عملي زي زي زمايلي الي في الجامعة الي بنبقي قاعدين في نفس المحاضرة وبنسمع لنفس الدكتور ومن حقي ومن حق كل الناس الي ظروفها زيي ان يبقي حسابنا معمول في النظام و في اٍلية معينة بتتعامل مع فاقدين ألرعاية الأبوية و الأيتام لأن احنا مش قليلين احنا كتار و الي حصل معايا النهاردة ممكن يحصل مع مليون واحد غيري ومن حقي اني اتعامل زي بقيت الناس العادية لان محدش احسن من حد من حقك انك تستعلم عني بس مش هخترع اهل علشان تستعلم عنهم ومن حقي اني احس اني انسان زيي زي اي حد من غير تفرقة و عنصرية أحساس صعب بجد اني ابقي مقدم ع حاجة مع زمايلي و ياخدوهم كلهم و يودوني حتة تانية علشان خانة الأب و الأم فاضية أحساس صعب و اٍنا بحاول اشرحلهم اٍني مش عارف أكتب حاجة في خانة الأب و الأم و كل العيون الي في المكان بصالي.
وأكد: عمري مهنسي كمية الأحباط وخيبة الأمل الي كنت فيها النهاردة بعد مكنت متحمس اني هشوف حجات جديدة وهدخل ورش عالمية علشان اتعلم و اعتذرت عن تدريب في مكان تاني علشان اروح التدريب ده ودي مش أول مرة يحصل معايا موقف سخيف زي ده و مش أول ولأ اخر شاب يتيم او شابة يتيمة يتعرض لموقف زي ده احنا بنتعرض لسخافات كتيييير اوي في حياتنا في المدرسة، الشارع، الجامعة، الشغل، و انا عادة كنت بسكت و مش بتكلم بس بجد كفاية سكوت بقي.
وتابع: محتاجين كل مكان في الجمهورية و كل المصالح انهم يبقو عندهم الوعي ان في ناس مختلفة عايشة معاكم ع الكوكب و مش كل الناس عندها اب وام وفي ناس ايتام وفي ناس في بيوت بديلة ولازم تستوعبونا ولازم يحصل تعديل لنظام الاماكن بحيث انه يستوعبنا ويخلينا مش محرجين وإحنا بنقدم او بنسجل في أي حاجة، مشيرا إلى أنه تم التوصل معي من وزارة الطيران وقال لي المشكلة هتتحل.
