حصل على 95%.. أحد طلاب لجنة "العائلات" بسوهاج: نجحنا بجهودنا وعيب اللي يتقال في حقنا (فيديو)
تداول رواد مواقع التواصل الاجتماعي، منشورات تخص حصول أبناء عائلات الصعيد على مجاميع عالية ومتقاربة، مؤكدين وجود حالات غش جماعي بمراكز جهينة ودار السلام بسوهاج.
والتقت "مصر تايمز" بـ"شهاب محمد أبو عقيل"، أحد أبناء عائلة أبوعقيل في جهينة شمال محافظة سوهاج، والذي حصل على مجموع 95% وقرر الالتحاق بكلية الطب البشري، وبسؤاله عما تم تداوله، قال: "نجحنا بمجهودنا وعيب اللي يتقال في حقنا، احنا مدرسة في وش مركز شرطة جهينة والأمن محاوط المدرسة والغش مش ممكن يحصل، حصلت على مجموعي لأني كنت بذاكر حوالي عشر ساعات يوميًا وبجتهد".
واستكمل "محمد أبو عقيل" والد الطالب شهاب حديثه قائلًا: "احنا عيلة عددها كبيرة حوالي 30 ألف أسرة ومننا تقريبا 300 طالب في ثانوية عامة نجح منهم 50 طالبا بمجموع عالي، ودا بالنسبة للعيلة فشل ناس كتير مننا زعلانة، والمراكز التانية زعلانة ومستغربة عدد الطلاب ولكن زي ما ذكرت العدد طبيعي مقارنة بالعدد الكلي".
وأضاف "توفيق أبو عقيل": "مدرستنا زي أي مدرسة واللجنة زي أي لجنة مفيش غش ولا تسيب بالعكس الأمن منتشر ومشدد على الغش، كنت أتوقع شهاب يجيب أكتر من 95% لأنه متفوق ومميز ولكن الحمد لله على كل حال".
وقامت أحد المتابعات بطرح سؤال "بفلوسكم ولا بالغش؟"؛ ليقوم والد الطالب بالرد عليها قائلًا: "دا كلام الناس الفاشلة محدش مننا دفع أي فلوس ولا حد غش"، وتابع توفيق: "مفيش فلوس اتدفعت وفي عائلات كتيرة حصل أبنائها على نفس المجموع تقريبا محدش كلمهم، والعدد الخاص بأبناء أبوعقيل بيشمل طلاب من داخل وخارج مركز جهينة احنا لينا أفرع كتير برة المركز في المنيا وإسكندرية وغيره، وكل سنة مميزين والأسماء بتكون زيادة عن عدد السنة دي لأننا عددنا كبير".
ووجه توفيق رسالة للمتابعين: "كفاية حقد وحسد"، وقال شهاب: " عليقات الناس بتأذيني نفسيًا انا تعبت واجتهدت وطبيعي اجيب مجموع".
